रायपुर, 8 अगस्त 2024। पेरिस ओलंपिक ले विनेश फोगट के संबंध म आए निराशाजनक खबर के बीच छत्तीसगढ़ म खिलाड़ी मन के हौसला बढ़ाय वाले सुग्घर समाचार आए हे।
छत्तीसगढ़ के तलवारबाजी के खिलाड़ी रीबा बेन्नी मुख्यमंत्री के पहल म न्यूजीलैंड म होवत कॉमनवेल्थ म ना केवल सामिल होइस बल्कि उहां सिल्वर मेडल घलोक जीते हे। वोकर माता पिता ह आज मुख्यमंत्री जनदर्शन म पहुंच के श्री विष्णुदेव साय के आभार जताए हे।
छत्तीसगढ़ के मुख्यमंत्री के घर म साप्ताहिक जनदर्शन के कार्यक्रम होथे। जेमें ए बिरसप के तलवारबाजी के खिलाड़ी रीबा बेन्नी के विसय आइस। खिलाड़ी के चयन न्यूज़ीलैंड बर होय रहिस फेर प्रतियोगिता म सामिल होए बर वोकर तिर पइसा नइ रहिस।
जनदर्शन म जइसनहे मुख्यमंत्री श्री विष्णुदेव साय ल एखर जानकारी होइस उमन रीबा बेन्नी ले कहिन सूटकेस तैयार कर ले। पइसा के इंतजाम हो जाही। मुख्यमंत्री श्री साय ह सहृदयता ले पहल करत तुरंत चार लाख रूपिया पास करे रहिन।
पइसा मिलिस अऊ रीबा न्यूजीलैण्ड म प्रतियोगिता म सामिल हो सकीस संगेच वो ह सिल्वर मेडल जीत के आइस। आज मुख्यमंत्री के घर म आयोजित जनदर्शन कार्यक्रम म ए ख़ुशी ल रीबा बेन्नी के माता-पिता ह मुख्यमंत्री के संग साझा करिन अऊ सम्मान म उमन श्री साय ल श्रीफल भेंट करके सहायता बर आभार जताइन।
