मुख्यमंत्री श्री बघेल ह लॉन्च करिस छत्तीसगढ़ के पहिली छत्तीसगढ़ी डिजिटल रेडियो स्टेशन ‘रेडियो संगवारी‘

रायपुर, मुख्यमंत्री श्री भूपेश बघेल ह आज अपन निवास कार्यालय म आयोजित कार्यक्रम म छत्तीसगढ़ के पहिली डिजिटल रेडियो स्टेशन ‘रेडियो संगवारी’ ल लॉन्च करिस। उमन ये मौका म रेडियो संगवारी के संस्थापक अऊ संचालक संग पूरा टीम ल छत्तीसगढ़ के कला अऊ संस्कृति ल व्यापक प्रचार-प्रसार के दिशा म एक बेहतर प्रयास बतात बधाई अउ शुभकामना दीन।
मुख्यमंत्री श्री बघेल ह कहिन कि रेडियो संगवारी के माध्यम ले छत्तीसगढ़ी लोक कला, लोक संस्कृति अऊ गीत-संगीत ल आम मनखे मन तक डिजिटल रेडिया स्टेशन के माध्यम ले पहुंचाए बर रेडियो संगवारी के स्थापना करे गए हे, मोला ये जानके बडबड खुशी हाइस। मोला बताए गीस कि छत्तीसगढ़ के कला अऊ संस्कृति ल एप के माध्यम ले पूरा दुनिया के मनखे मन तक पहुंचाए जाही, निश्चित रूप ले ये बहुत ही सराहनीय प्रयास हे।
मुख्यमंत्री श्री बघेल ह कहिन कि छत्तीसगढ़ के लुप्त होवत सांस्कृतिक विधा अऊ कला परंपरा मनं ल नवा जीवन देहे बर ये प्लेटफार्म एक ताकतवर माध्यम हो सकत हे। नवा कलाकार मनं के प्रतिभा मन ल घलोक एखर माध्यम ले आसानी ले दुनिया के आगू लाए जा सकत हे। रेडियो के श्रोता मन के आज घलोक कमी नइ हे। अपन नवाचार अऊ अपन नवा सोच के सेती बहुत अकन रेडियो स्टेशन आज घलोक बहुत ही लोकप्रिय हे, मोला उम्मीद हे कि रेडियो संगवारी कोति ले शुरू करे जात डिजिटल रेडियो स्टेशन घलोक अइसनहेच लोकप्रिय माध्यम बनही।
ये बेरा म रेडियो संगवारी के संस्थापक श्री राहुल शर्मा अऊ सह-संस्थापक डॉ. हेमंत सिरमौर ह बताइस कि रेडियो संगवारी ल टू-जी इंटरनेट स्पीड म घलोक आराम ले सुना जा सक हे। कार्यक्रम म प्रोग्राम संचालक श्री मनीष बघेल ह बताइस कि गूगल प्ले स्टोर म Radio Sangwari  लिखके एला डाउनलोड करे जा सकत हे। ये बेरा म सुश्री आर.जे. श्रेया, श्री जगमीत सिंह, श्री अनुज शर्मा अऊ रेडियो संगवारी के जम्मो सदस्य उपस्थित रहिन।