दिल्ली मेला म छत्तीसगढ़ के धूम! विदेशी खरीदार घलोक होइन मुरीद – मुख्यमंत्री बोलिन: ये हरे नवा बदलत छत्तीसगढ़

रायपुर, नई दिल्ली के भारत मंडपम म आयोजित अंतरराष्ट्रीय व्यापार मेला म आज छत्तीसगढ़ के पेवेलियन सबले बड़े आकर्षण बने रहिस। मुख्यमंत्री विष्णुदेव साय ह पेवेलियन के अवलोकन करत राज्य के पारंपरिक उत्पाद, नवाचार अऊ कारीगर मन के हुनर ल खुलके सहराइन।
उमन कहिन के छत्तीसगढ़ के हस्तशिल्प, वनोपज आधारित चीज, कोसा सिल्क, ढोकरा कला अऊ मिलेट उत्पादों के देश-विदेश म तेजी ले बढ़त मांग ए बात के प्रमाण हे के राज्य के कारीगर वैश्विक बाजार म अपन मजबूत पहिचान बनावत हें। मुख्यमंत्री ह एला “आत्मनिर्भर छत्तीसगढ़” के दिशा म बड़का कदम बताइन।
साय ह बस्तर के समृद्ध कला-विरासत ले सजे स्टॉल मन ल विशेष तौर म सहराइन अऊ ‘बदलता बस्तर (आमचो बस्तर)’ नामक डॉक्यूमेंट्री देखके कहिन के ये नवा बस्तर के प्रगति अऊ बदलाव ल सही रूप म देखाथे।
मुख्यमंत्री ह कहिन के राज्य सरकार ग्रामीण अऊ जनजातीय उत्पाद मन ल राष्ट्रीय अउ अंतरराष्ट्रीय बाजार तक पहुँचाए खातिर सरलग संस्थागत समर्थन बढ़ावत हे, जेखर से स्थानीय अर्थव्यवस्था मजबूत होवत हे अऊ कारीगर मन ल नवा अवसर मिलत हे।
ए बेरा म उद्योग मंत्री लखन लाल देवांगन, सांसद बृजमोहन अग्रवाल अऊ आन जनप्रतिनिधि उपस्थित रहिन।