रायपुर, 1जुलाई 2020। कोरोना बीमारी के सेती आम लोग मन ले लेके अधिकारी अउ नेता मन तक ह जान गंवाये हे. इही बीच कोरोना ले जुड़े छत्तीसगढ़ ले बड़का खबर निकल के आगु आये हे. रिटायर्ड आईएफएस अफसर केसी यादव के कोरोना वायरस ले मउत होगे हे. केसी यादव ल दू दिन पहली रायपुर एम्स अस्पताल म भर्ती कराये गे रहिस, जिहां बीते रात करीब साढ़े 11 बजे उंखर निधन होगे. एम्स प्रबंधन ह उंखर निधन के पुष्टि करे हे. जानकारी के अनुसार रिटायर्ड आईएफएस केसी यादव ल अनियंत्रित डायबिटीक के शिकायत के बाद दू दिन पहली ही एम्स म भर्ती कराये गे रहिस. वो कोरोना सस्पेक्ट रहिस, जांच बर सैम्पल भेजे गे रहिस, जब रिपोर्ट आइस त कोरोना पॉजिटिव निकल गे. अनियंत्रित डायबिटीज अउ कोरोना पॉजिटिव होय के सेती ले उंखर स्थिति बिगड़त चले गे. इही कारण हे कि मंगलवार के रात वो दम तोड़ दिस.
बता देथन कि केसी यादव 1984 बैच के आईएफएस अफसर रहिस. वो छत्तीसगढ़ फारेस्ट म कई अहम जिम्मेदारी संभाल चुके हे. केसी 2019 म मई के महीने म रिटायर होय रहिस. रिटायर होय के बाद केसी यादव ल 2019 के सितंबर महीने म मैटस विश्वविद्यालय रायपुर के फैकल्टी ऑफ बायोलाजिकल एण्ड केमिकल साइंस ह बायो साइंस विषय म पीएचडी के उपाधि दे गे रहिस.