मंत्री श्री अकबर ह छेरछेरा म किसान मन ल दीन धान के दान

रायपुर, वन अउ जलवायु बदलाव मंत्री श्री मोहम्मद अकबर ह छेरछेरा के पावन पर्व के अवसर म अपन शंकरनगर स्थित शासकीय निवास कार्यालय म छेरछेरा मांगे आए नवा रायपुर के किसान मन ल बड़ विनम्रता अऊ सम्मान के संग धान के दान दीन। उमन ये मौका म किसान मंच समिति के सबो पदाधिकारी अउ किसान भाई मन ल छेरछेरा पर्व अऊ शाकम्भरी जयंती के बधाई अऊ शुभकामना दीन।
मंत्री श्री अकबर ह कहिन कि छत्तीसगढ़ के जनजीवन म छेरछेरा पर्व के विशेष महत्व हे। ये पर्व दानशीलता अऊ सामाजिक समरसता के चिनहा ये। किसान मंच समिति ले जुड़े हमार अन्नदाता किसान भाई आज ये पावन पर्व म छेरछेरा मांगके छत्तीसगढ़ के समृद्ध संस्कृति ल आगू बढ़ावत हें। मंत्री श्री अकबर ल ये मौका म किसान मंच समिति के पदाधिकारी अउ सदस्य मन ह नवा रायपुर म पुनर्वास अउ पुनर्व्यवस्थापन के मांग मन के संबंध म ज्ञापन सौंपिन। मंत्री श्री अकबर ह किसान भाई मन के मांग मन के संबंध म मुख्यमंत्री श्री भूपेश बघेल अउ नवा रायपुर विकास प्राधिकरण के अधिकारी मन ले चर्चा करके उंखर मांग मन के यथोचित समाधान करे के भरोसा देवाईन।