रायपुर, 05 जून 2024। मुख्य निर्वाचन पदाधिकारी श्रीमती रीना बाबासाहेब कंगाले ह लोकसभा आम निर्वाचन-2024 म सहभागिता देवइया सबो अधिकारी, कर्मचारी, संगठन अऊ मतदाता मन के प्रति आभार व्यक्त करे हें। उमन कहे हें के प्रदेश के मतदाता मन ह उछाह ले अपन मताधिकार के परयोग करके लोकतांत्रिक व्यवस्था म अपन सहभागिता देहे हें। उमन निर्वाचन काम म लगे अउ नियोजित सबो अधिकारी अउ कर्मचारी मन ल धन्यवाद ज्ञापित करे हें।
मुख्य निर्वाचन पदाधिकारी श्रीमती कंगाले ह केन्द्रीय सुरक्षा बल मन अऊ राज्य पुलिस बल के प्रति तको आभार व्यक्त करे हें, जेमन स्वतंत्र अउ निष्पक्ष निर्वाचन कराए म महत्वपूर्ण भूमिका के निर्वहन करे हें। उमन प्रिंट, इलेक्ट्रॉनिक अउ वेब मीडिया के सबो पत्रकार मन के प्रति घलोक आभार व्यक्त करे हें जेमन आम निर्वाचन के समय निर्वाचन ले संबंधित महत्वपूर्ण दिशा-निर्देश अउ निर्वाचन गतिविधि मन के प्रभावी रूप ले प्रचार-प्रसार करे हें। उमन लोकतंत्र के ए महापर्व म प्रत्यक्ष अउ अप्रत्यक्ष रूप ले सामिल सबो शासकीय अउ गैर शासकीय प्रतिभागी, कई ठन लोक सेवी संस्था अऊ संगठन मन के प्रति आभार व्यक्त करे हें।
