सुपोषित सरगुजा अभियान अऊ मुख्यमंत्री अन्नकोष योजना के शुभारंभ

रायगढ़, छत्तीसगढ़ शासन कोति ले कुपोषण के खिलाफ निर्णायक लड़ाई के दिशा म एक अऊ प्रभावशाली पहल करे गए हे। सरगुजा जिला म आज ले “सुपोषित सरगुजा अभियान” अऊ मुख्यमंत्री अन्नकोष योजना के विधिवत शुभारंभ होइस। महिला अऊ बाल विकास विभाग कोति ले संचालित ये संघरा पहल कलेक्टर श्री विलास भोसकर के मार्गदर्शन म जिला खनिज न्यास निधि (DMF) मद ले क्रियान्वित करे जात हे।
सुपोषित सरगुजा अभियान के तहत जिला के आंगनबाड़ी केन्द्रमन म दर्ज 6 महिना ले 6 साल तक के उम्‍मर के लगभग 9500 कुपोषित लइका मन ल अब हफ्ता म छै दिन अकतहा पोषण आहार दे जाही। सोमवार, बुधवार, सुकरवार अंडा या केला अऊ मंगलवार, बिरसपतवार, सनिवार भुजे चना के सत्तू अऊ गुड़ ल आहार म सामिल करे जाही।
ये पहल टेक होम राशन अऊ गरम भोजन योजना के पूरक के रूप म संचालित होही। एकर उद्देश्य लइका मन के रोग प्रतिरोधक क्षमता म बढ़ोतरी करत ऊंखर शारीरिक अऊ मानसिक विकास ल ठउका करना हे।
मुख्यमंत्री अन्नकोष योजना के तहत जिला के 459 पहाड़ी कोरवा गर्भवती अऊ शिशुवती महिला मन ल हर महिना 1 किलो चना अऊ 1 किलो मूंग दाल नि:शुल्क देहे जाही। एखरे संग, पोषण सामान के सही उपयोग अऊ चुरोए के विधि मन के जानकारी घलोक महिला मन ल दे जाही ताकि ओ मन जादा ले जादा लाभ प्राप्त कर सकंय।
अभी हाल म ए महिला मन ल हफ्ता म एक पइत 900 ग्राम रेडी-टू-ईट पैकेट देहे जात हे, जेन शिशु के स्तनपान उपर निर्भरता के स्थिति म अपर्याप्त होथे। अइसन म ये नवा योजना ऊंखर बर पोषण के एक सशक्त माध्यम बनके उभरही।
ये पहल प्रधानमंत्री जनजातीय आदिवासी न्याय महाभियान (PM JANMAN) के उद्देश्य मन के मुताबिक हे, जेन विशेष पिछड़ी जनजाति मन के सामाजिक, पोषणीय अऊ आर्थिक स्थिति ल सुदृढ़ करे के दिशा म काम करत हे।