समूह के महिला मन ह अब तक 1152 लीटर सेनेटाईजर बेचके कमाइन 1.35 लाख रूपिया
रायपुर, 09 अगस्त 2020। विश्व आदिवासी दिवस म मुख्यमंत्री श्री भूपेश बघेल आज अपन रायपुर निवास ले वीडियो कॉन्फ्रेंसिंग के माध्यम ले प्रदेश के कई ठन जिला मन के महिला स्व सहायता समूह मन ले घलोक सीधा रू-ब-रू होइन। मुख्यमंत्री ह जशपुर जिला म महुआ ले सेनिटाईजर बनइया सिनगी स्व-सहायता समूह के महिला मन ले चर्चा करत ऊंखर ये नवाचार के सराहना करिन। समूह के सचिव श्रीमती करूणा भगत ह मुख्यमंत्री ल बताइस के वन विभाग ले मिलके वनधन विकास योजना के तहत् 10 आदिवासी स्व-सहायता समूह के महिला मन सेनिटईजर बनाए के काम करत हें। मई महिना ले अब तक 3150 लीटर सेनिटाईजर ओ मन बना डरे हें। समूह कोति ले 1152 लीटर सेनिटाईजर के विक्रय करके 5 लाख 52 हजार रूपिया अर्जित करे गए हे। एखर से समूह ल 1 लाख 35 हजार के राशि के मुनाफा होय हे। मुख्यमंत्री ह महुआ ले लड्डू बनइया स्व-सहायता समूह के सचिव दुर्गा भगत ले महुआ लड्डू के जानकारी घलोक लीन। मुख्यमंत्री ह समूह के महिला मन ल विश्व आदिवासी दिवस के शुभकामना देवत नवा-नवा परयोग बर प्रोत्साहित करिन।
