रायपुर, मुख्यमंत्री श्री भूपेश बघेल ह आज अपन निवास कार्यालय म रायपुर के व्यवसायी श्री प्रवीण सोमानी के सकुशल वापसी अऊ आरोपी मन के गिरफ्तारी उपर टीम म सामिल छत्तीसगढ़ संग आन राज्य मन के पुलिस अधिकारी मन अऊ कर्मचारी मन के मनोबल बढ़ाइन अऊ पुलिस के ये उपलब्धि बर ओ मन ल बधाई घलोक दीन। मुख्यमंत्री श्री बघेल ह ये मौका म टीम के पुलिस अधिकारी मन अऊ कर्मचारी मन के सफलता के विशेष रूप ले सराहना करिन अऊ टीम म सामिल छत्तीसगढ़ के पुलिस अधिकारी मन अऊ कर्मचारी मन के एक-एक वेतन वृद्धि के घोषणा करिन।
मुख्यमंत्री श्री बघेल ह कहिन कि प्रदेश म व्यवसायी श्री सोमानी के अपहरण के घटना ल तुरंते गंभीरता ले लेहे गीस अऊ शासन-प्रशासन संग पुलिस बल कोति ले ओखर सकुशल वापसी बर हर जरूरी पहल करे गीस। उमन अपहरणकर्ता मन के चंगुल ले श्री सोमानी के सकुशल वापसी अऊ आरोपी मन के गिरफ्तारी बर गठित टीम के पुलिस बल के कुशल रणनीति, साहस अऊ कार्यकुशलता ल बिक्कट सहराइन। मुख्यमंत्री ह कहिन कि इंकर कुशल रणनीति के सेती ही अपहृत व्यवसायी ल छोड़ाए म सफलता मिलीस। मुख्यमंत्री श्री बघेल ह छत्तीसगढ़ के संगें-संग ओडिसा, बिहार, गुजरात आदि राज्य मन के पुलिस बल मन ले मिले सहयोग के घलोक सराहना करिन। उमन कहिन कि छत्तीसगढ़ म पुलिस के छबि पहिली ले बढि़या हो गए हे। इहां अब तत्परता अऊ कुशलता ले होवत हर कार्रवाई के सेती अपराधी मन के मन म भय पैदा होय हे अऊ एखर से अपराध के रोकथाम म मदद मिलत हे। संगेच शांति अऊ कानून व्यवस्था के प्रति जनता के विश्वास म बढ़ोत्तरी होए हे।
मुख्यमंत्री श्री भूपेश बघेल ले आज संझा ऊंखर निवास कार्यालय म पुलिस महानिरीक्षक रायपुर रेंज श्री आनंद छाबड़ा अऊ वरिष्ठ पुलिस अधीक्षक रायपुर श्री आरीफ एच. शेख के नेतृत्व म टीम म सामिल पुलिस अधिकारी-कर्मचारी मन ह मुलाकात करिन। ये बेरा म मुख्यमंत्री के प्रमुख सचिव श्री गौरव द्विवेदी, उप पुलिस अधीक्षक सुश्री कल्पना वर्मा, उप पुलिस अधीक्षक श्री लोकेश देवांगन अऊ टीम म सामिल पुलिस के अधिकारी-कर्मचारी श्री रमाकांत साहू, श्री अश्वनी राठौर, श्री सोनल ग्वाला, श्री विशाल सोम, श्री नितिन उपाध्याय, श्री होमचंद नागरची, श्री शंकरलाल धु्रव, श्री किशोर सेठ, श्री नत्थे सिंह, श्री जमील खान, श्री संतोष सिंह, श्री सरफराज चिश्ती, श्री महेन्द्र राजपूत, श्री प्रदीप पटेल, श्री प्रेमराज बारिक, श्री कुलदीप द्विवेदी, श्री संदीप दीक्षित, श्री राधाकांत पाण्डेय, श्रीमती बसंती मौर्य आदि उपस्थित रहिन।
