मुख्यमंत्री भूपेश बघेल ह प्रदेशवासी मन ल पोला तिहार के दीन बधाई

रायपुर, 18 अगस्त 2020। प्रदेश के मुख्यमंत्री भूपेश बघेल ह जम्मो प्रदेशवासी मन ल विशेष रूप ले किसान भाई मन ल छत्तीसगढ़ के पारंपरिक पोला तिहार के बधाई अउ शुभकामना देहे हे। ये अवसर म श्री बघेल ह नागरिक मन के सुख-समृद्धि अउ खुशहाली के कामना करे हे। अपन शुभकामना संदेश म ओमन कहिन कि पोला तिहार छत्तीसगढ़ के परम्परा, संस्कृति अउ लोक जीवन के गहराइ ले जुड़े हे। ये तिहार म उत्साह ले बइला अउ जाता-पोरा के पूजा करके अच्छा फसल अउ घर ल धन-धान्य ले परिपूर्ण होय बर प्रार्थना करे जाथे। ये तिहार हमर जीवन म खेती-किसानी अउ पशुधन के महत्व बताथे। श्री बघेल ह कहिन कि ये पर्व लइका मन ल हमर संस्कृति अउ परम्परा मन ले परिचय कराये के घलो अच्छा माध्यम हे। घर मन म प्रतिमान स्वरूप माटी के बइला अउ बर्तन मन के पूजा करके लइका मन ल खेले बर देहे जाथे। जेखर ले लइका अनजान म ही अपन माटी अउ ओखर सरोकार मन ले जुड़थे। मुख्यमंत्री श्री भूपेश बघेल ह कोविड-19 के प्रकोप ल देखत हुए ग्रामीण अउ किसान भाई मन ले पोला तिहार के मनाये बेरा मास्क लगाये अउ फिजिकल डिस्टेंसिंग के पालन करे के अपील करे हे।