तीजा-पोरा म मुख्यमंत्री श्री भूपेश बघेल ह समूह के महिला बहिनी मन ल दीन बड़का सौगात

रायपुर, मुख्यमंत्री श्री भूपेश बघेल ह आज अपन निवास म आयोजित तीजा-पोरा तिहार के कार्यक्रम के अवसर म समूह के महिला-बहिनी मन ल दीन बड़का सौगात दीन। मुख्यमंत्री ह महिला कोष के ऋण योजना के अंतर्गत सबो महिला समूह मन के कालातीत ऋण मन ल माफ़ करे के घोषणा करे हें ताकि ओ मन फेर ऋण लेके नवीन आर्थिक गतिविधि आरम्भ कर सकयं। मुख्यमंत्री ह एखरे संग महिला कोष ले महिला समूह मन ल हर साल मिलइया ऋण के बजट म घलोक 5 गुना वृद्धि करे के घोषणा करत महिला कोष के बजट के राशि दू करोड़ रूपिया ले बढ़ाके 10 करोड़ रूपिया करे के घोषणा करे हें। मुख्यमंत्री ह किसान अऊ मजदूर मन के बाद अब महिला मन बर न्याय के पहल करत घोषणा पत्र के अपन एक अऊ वादा पूरा कर देहे हें।
मुख्यमंत्री श्री भूपेश बघेल के ये घोषणा राज्य म न्याय के एक कड़ी ल अऊ आगू बढ़ाए के रूप म देखे जात हे। एखर से स्व सहायता समूह मन ले जुड़े लाखों बहिनी मन के सिर ले 12 करोड़ 77 लाख रूपिया के करजा के बोझा उतर जाही। तीजा-पोरा पर्व म राज्य के महिला बहिनी मन बर मुख्यमंत्री श्री भूपेश बघेल के सरकार कोति ले ये बहुत बड़का सौगात हे। मुख्यमंत्री ह आज अपन निवास कार्यालय म राज्य भर के माता-बहिनी मन बर आयोजित तीजा-पोरा कार्यक्रम म जइसेच महिला समूह मन के कालातीत ऋण के माफी के एलान करिन, माता-बहिनी मन ले खचाखच भरे पूरा पंडाल ताली ले गूंज उठिस। मुख्यमंत्री ह सबो माता-बहिनी मन ल तीजा-पोरा के बधाई अऊ शुभकामना देवत उंखर खुशहाली अऊ समृद्धि के कामना करिन।