कोरिया, 12 दिसम्बर 2020। मुख्यमंत्री भूपेश बघेल ह आज इहां कोरिया जिला मुख्यालय बैकुण्ठपुर स्थित विश्राम गृह म अधिकारी अऊ कर्मचारी मन ले मुलाकात करिन। मुख्यमंत्री ह सबो अधिकारी मन ले उंखर परिचय प्राप्त करिन अऊ कोरिया जिला के विकास योजना मन ऊपर अधिकारी मन ले चर्चा करिन। बड़ा ही आत्मीयता अऊ सरल, सहज रूप म अधिकारी अऊ कर्मचारी मन के बीच बइठ के उंखर पारिवारिक हाल-चाल जानिन। परिचय के दौरान मुख्यमंत्री बघेल ह लोक स्वास्थ्य यांत्रिकी विभाग के कार्यपालन अभियंता ले जिला म भू-जल संवर्धन हेतु वाटर रिचार्जिंग के योजना मन ऊपर विशेष ध्यान देहे के बात कहिन। उमन कहिन कि नरवा योजना जलस्तर संवर्धन के दिशा म शासन के प्रयास हे। इही तरह उमन गुरू घासीदास राष्ट्रीय उद्यान के संचालक ले वन्य जीव संरक्षण हेतु कार्ययोजना बनाए ऊपर चर्चा करिन। अपन बीच प्रदेश के मुख्यमंत्री ल पाके अधिकारी-कर्मचारी अब्बड़ खुश होइन। अधिकारी मन ह मुख्यमंत्री बघेल के संग अपन परेशानी मन ल साझा करिन। मुख्यमंत्री बघेल ह सबो ल अपन हार्दिक बधाई अऊ शुभकामना देवत हुए जिला म अच्छा कार्य करे बर प्रोत्साहित करिन।
ये अवसर म प्रभारी मंत्री डॉ. शिव कुमार डहरिया, स्कूल शिक्षा मंत्री डॉ. प्रेमसाय सिंह टेकाम, खाद्य मंत्री अमरजीत भगत, तकनीकी शिक्षा मंत्री उमेश पटेल, संसदीय सचिव अऊ बैकुण्ठपुर क्षेत्र के विधायक अंबिका सिंहदेव, सरगुजा विकास प्राधिकरण के उपाध्यक्ष अऊ भरतपुर-सोनहत क्षेत्र के विधायक गुलाब कमरो, सरगुजा संभाग आयुक्त जेनेविवा किन्डो, आईजी रतन लाल डांगी, कलेक्टर एसएन राठौर, पुलिस अधीक्षक चन्द्रमोहन सिंह सहित अन्य अधिकारीगण उपस्थित रिहिन।