- कोराना वायरस ल लेके केन्द्र सरकार कोति ले करे जात सकारात्मक पहल ल सहराईन
- मुख्यमंत्री ह राज्य म लॉकडाउन अऊ कोरोना वायरस बर करे जात उदीम मन के दीन जानकारी
- श्री बघेल ह प्रधानमंत्री ले मनरेगा मजदूर, असंगठित कामगार, जन-धन खाता अऊ संगठित क्षेत्र के कामगारों बर राहत पैकेज दे के करिस अनुरोध
रायपुर, 29 मार्च 2020। मुख्यमंत्री श्री भूपेश बघेल ह प्रधानमंत्री श्री नरेन्द्र मोदी ल चिट्ठी लिखके कोराना वायरस (कोविड-19) के संक्रमण ल रोके बर केन्द्र सरकार कोति ले करे जात सकारात्मक पहल के सराहना करे हें उहें उमन प्रधानमंत्री ल छत्तीसगढ़ म कोराना पीड़ित मन के स्थिति अऊ लॉकडाउन के बेरा म करे जात व्यवस्था मन के जानकारी देहे हें।
मुख्यमंत्री श्री बघेल ह प्रधानमंत्री ले मनरेगा मजदूर, असंगठित कामगार, जन-धन खाता अऊ संगठित क्षेत्र के कामगार मन बर राहत पैकेज देहे के अनुरोध करे हें ताकि ओ मन ल ये विपदा के घड़ी म आर्थिक सहायता मिल सकय।
मुख्यमंत्री श्री बघेल ह अपन चिट्ठी म लिखे हें के छत्तीसगढ़ म 21 मार्च ले कोरोना वायरस के प्रसार ल रोके बर लॉकडाउन के घोषणा करे गए हे। जेखर से राज्य म कोरोना पीड़ित मन के संख्या सीमित रखे म सहायता मिले हे। राज्य म आज दिनांक तक कोरोना वासरस ले 7 मनखे प्रभावित होए हें, उंखर दशा घलोक सामान्य हे। सौभाग्य ले राज्य म कोरोना पीड़ित कोनो मनखे के मृत्यु नइ होए हे। एम्स रायपुर के अमला अऊ राज्य शासन के सबो अधिकारी आपदा के ये बेरा म आम जनता ल सबो जरूरी जिनिस मन के पहुच ठउका करे बर पूरा मुस्तैदी के संग मोर्चा सम्हाले हे। फेर लॉक डाउन ले धीरे-धीरे राज्य के जनसंख्या के बड़का हिस्सा ल आर्थिक संकट के सामना करना परत हे।
मुख्यमंत्री ह कहे हें के 26 मार्च के केन्द्रीय वित्तमंत्री कोति ले आजजन ल सहायता पहुंचाए बर करे गए घोषणा मन सराहनीय हे, जेमां समाज के बड़े तबका ल राहत मिले हे। केन्द्र सरकार कोति ले करे गए सकारात्मक पहल ल सरलग जारी रखे के जरूरत हे, काबर के अभी तक समाज के एक बड़का वर्ग वो घोषणा मन ले लाभ प्राप्त करे म अभी तक वंचित हे। विशेष तौर म मनरेगा योजना के तहत अवइया भूमिहीन मजदूर अऊ असंगठित क्षेत्र के कामगार, अभी हाल परिस्थिति मन म इंकर जीवन-यापन दूभर होना तय हे।
श्री बघेल ह कहे हें के केन्द्रीय वित्त मंत्री जी कोति ले करे गए घोषणा मन के संदर्भ म ऊंखर अकतहा मोर कुछ सुझाव ये प्रकार हे-
मनरेगा अउ असंगठित क्षेत्र के कामगार मन ल अवइया तीन महिना तक हर महिना एक हजार के राशि ऊंखर खाता म अंतरित करे जाय। सबो जन-धन खाता धारक मन ल 750 रूपिया हर महिना अवइया 3 महिना तक ऊंखर खाता म अंतरित करे जाय। ये मां महिला, पुरूष, जीरो बैलेन्स या अप्रचलित खाता सबो सामिल होवय।
श्री बघेल ह एखर संगेच संगठित क्षेत्र के सबो कामगार जिनला 15 हजार हर महिना ले कम राशि मिलथे, उंखर भविष्य निधि के पूरा राशि अवइया तीन महिना तक केन्द्र सरकार कोति ले वहन करे अऊ वोमा कोनो प्रकार के पूर्व शर्त नइ रखे के अनुरोध करे हें। श्री भूपेश बघेल ह प्रधानमंत्री ले कहे हें के कहूं ये सुझाव के स्वीकृति देहे जाही तभे हम कोरोना के खिलाफ छेड़े गए जंग जीते म सफल हो सकबो नइ तो लाखों परिवार बर जीवन के संकट उत्पन्न होना निश्चित हे। मुख्यमंत्री ह प्रधानमंत्री ले विनम्र अनुरोध करे हें के ए मांग मन के स्वीकृति शीघ्र अतिशीघ्र प्रदान करे के कष्ट करव ताकि ए वर्ग ल बड़का राहत मिल सकय।
