मुख्यमंत्री ह देवारी मनाए गोल बाजार म माटी के दीया बिसाईन

रायपुर, मुख्यमंत्री श्री भूपेश बघेल धनतेरस म देवारी के खरीदी बर रायपुर के गोल बाजार पहुंचिन। मुख्यमंत्री ह देवारी मनाए बर गोल बाजार म स्थानीय कुम्हार मन ले माटी के दीया, मटकी, गणेश, लक्ष्मी अऊ सरसती के माटी के बनी मूर्ति, ग्वालिन के मूर्ति, मिठई अऊ लाखे नगर स्थित हिन्द स्पोर्टिंग मैदान म लगे फटाका दुकाने ले फटाखे बिसाईन। ये बेरा म संसदीय सचिव श्री विकास उपाध्याय, महापौर श्री एजाज ढेबर, विधायक श्री कुलदीप जुनेजा ऊंखर संग रहिन।
मुख्यमंत्री ह छत्तीसगढ़िया उत्पाद ल प्रमोट करे के उद्देश्य ले प्रदेशवासी मन ले स्थानीय स्तर म तियार सामान बिसाए के अपील करिन। उमन मनखे मन ल धनतेरस अऊ देवारी परब के बधाई अऊ शुभकामना दीन। मुख्यमंत्री ह मनखे मन ले देवारी परब म माटी के दीया बार के अपन घर-आंगन ल रौशन करे के अपील करिन। मुख्यमंत्री ह कहिन कि माटी के दीया हमार कुम्‍हार भाई मन बड़ लगन अऊ मेहनत ले ये आशा के संग तियार करथें कि देवारी म मनखे मन ऊंखर दीया बिसाहीं अऊ देवारी म बारहीं। माटी के दीया बिसाए ले ले कुम्‍हार भाई मन के मेहनत के प्रतिफल ओ मन ल मिलथे अऊ हम सबके सहयोग ले उंखर देवारी घलोक धूम-धाम ले मनथे।