मुख्यमंत्री ह पंडित नेहरू के पुण्यतिथि म उमन ल करिन नमन

रायपुर, 26 मई 2021। मुख्यमंत्री श्री भूपेश बघेल ह देश के पहिली प्रधानमंत्री, भारत रत्न पंडित जवाहर लाल नेहरू के काली 27 मई के अवईया उंकर पुण्यतिथि म ओ मन ल सुरता करत नमन करे हें। श्री बघेल ह पंडित नेहरू के 57वां पुण्यतिथि के पूर्व संध्या म जारी अपन संदेश म कहे हें के पंडित नेहरू भारत भूमि के अनमोल रतन रहिन, जे मन देश के स्वाधीनता ले लेके एखर नवनिर्माण म महत्वपूर्ण भूमिका निभाईन। उमन कहिन के पंडित नेहरू जन-जन के प्रिय नेता रहिन। आज घलोक भारतवासी मन के दिल-दिमाग म ऊंखर व्यक्तित्व अऊ कृतित्व के अमिट छाप अंकित हे। मुख्यमंत्री ह कहिन कि पं. नेहरू ह देश के विकास बर लोकतंत्र ल अपन मूलमंत्र बनाइन अऊ भारत ल एक मजबूत आधार दीन। सामाजिक अधोसंरचना ले लेके सड़क, बिजली, पानी, रेलवे, विमानन जइसे भौतिक अधोसंरचना के विकास बर ऊंखर योगदान ल कभू भुलाए नइ जा सकय। भिलाई स्टील प्लांट छत्तीसगढ़ ल पं. नेहरू के अनुपम सौगात ये। नेहरू जी एक विद्वान लेखक, चिंतक अऊ विचारक घलोक रहिन, एखर झलक उंखर किताब ‘विश्व इतिहास के झलक‘ अऊ ‘भारत एक खोज‘ म मिलथे।