रायपुर, 19 जुलाई 2020। मुख्यमंत्री श्री भूपेश बघेल ह प्रदेशवासी मन ल हरेली तिहार के बधाई अऊ शुभकामना देहे हें। आज इहां हरेली के पहिली संझा के जारी अपन शुभकामना संदेश म श्री बघेल ह कहिन के हरेली छत्तीसगढ़ के जन-जीवन म रचे-बसे खेती-किसानी ले जुड़े पहिली तिहार हे। ये मां बने फसल के कामना के संग खेती-किसानी ले जुड़े औजार मन के पूजा करे जाथे। पूजा करके हम धरती माता के हमार भरण पोषण बर आभार व्यक्त करथन।
मुख्यमंत्री ह कहिन के ये साल हरेली के तिहार प्रदेशवासी मन बर ‘गोधन न्याय योजना’ के सौगात लेके आवत हे। हरेली ले राज्य सरकार के ये महत्वाकांक्षी अऊ देश के अपन जइसे पहली अनूठा योजना के शुभारंभ होवइया हे। जऊन ल लेके मनखे मन म अभूतपूर्व उत्साह हे। श्री बघेल ह कहिन के गांव-गांव म हरेली के परब बड़ उछाह अऊ उमंग ले मनाए जाथे। नागर, गैंती, कुदाली, फावड़ा समेत कृषि म काम अवइया सबो औजार मन के साफ-सफाई अऊ पूजा करे जाथे। पारंपरिक तरीका ले मनखे गेड़ी चढ़के हरेली के खुसी मनाथें। प्राचीन मान्यता अनुसार सुरक्षा बर घर के बाहिर नीम के पत्ति लगाए जाथे।
मुख्यमंत्री ह कहिन कि छत्तीसगढ़ के प्राचीन संस्कृति अऊ परंपरा हमर गौरव हे। छत्तीसगढ़ सरकार ह अपन संस्कृति अऊ परम्परा ल सहेजे बर कई फैसला लेहे हे। हरेली तिहार के दिन सार्वजनिक अवकाश घोषित करे गए हे। नरवा, गरूवा, घुरूवा, बारी योजना अऊ गोधन न्याय योजना लागू करके पारंपरिक संसाधन मन ल पुनर्जीवित करके ग्रामीण अर्थव्यवस्था ल मजबूत बनाए के काम करे जात हे। जुन्ना तरीका मन ल अभी हाल के परिस्थिति मन के मुताबिक उपयोगी बनाए जात हे। मुख्यमंत्री ह कहिन के परंपरा मन ल आधुनिक जरूरत के मुताबिक ढालना सामूहिक उत्तरदायित्व के काम हे। उमन आशा व्यक्त करे हें के सबो छत्तीसगढ़वासी लोक मूल्य मन ल सहेजत एक नवा विकसित छत्तीसगढ़ के सपना साकार करे म सहभागी होहीं।
