- मुख्यमंत्री ह नगर निगम के महापौर मन ले दूरभाष म चर्चा करके व्यवस्था के लीन जानकारी
- असहाय अऊ जरूरतमंद मन के सहायता बर कहिन
रायपुर, 30 मार्च 2020। मुख्यमंत्री श्री भूपेश बघेल ह प्रदेश के नगर निगम के महापौर मन ले चर्चा करके नगरीय क्षेत्र मन म कोरोना वायरस (कोविड-19) के संक्रमण ले बचाव बर लागू लॉकडाउन के समय होवत काम मन के जानकारी लीन। उमन कहिन कि लॉकडाउन के कड़ाई ले पालन होना चाही अऊ साफ-सफाई म विशेष ध्यान देहे जाना चाही।
मुख्यमंत्री श्री बघेल ह नगर निगम चरौदा के महापौर श्रीमती चंद्रकला मांडले, दुर्ग के महापौर श्री धीरज बाकलीवाल, अंबिकापुर के महापौर डॉ. अजय तिर्की, रायगढ़ के महापौर श्री जानकी काटजू, चिरमिरी के महापौर कंचन जायसवाल, कोरबा के महापौर श्री राजकिशोर प्रसाद बिलासपुर के महापौर श्री राम शरण यादव, बिरगांव के महापौर अंबिका यादव अऊ धमतरी के महापौर श्री विजय देवांगन ले चर्चा करिन।
मुख्यमंत्री ह चर्चा म कहिन कि नगरीय क्षेत्र मन म लॉक डाउन के कडाई ले पालन करे जाए। नगरीय क्षेत्र मन म जरूरी सेवा जनता मन ल सरलग मिलत रहय। ये बेरा म साफ-सफई अऊ स्वच्छता के विशेष ध्यान रखव। बेरा-बेरा म जरूरी सेवा मन ले जुड़े कार्यालय मन ल सेनेटाइज्ड करे जाए। जरूरी सेवा मन के आपूर्ति के समय सोशल डिस्टेंसिंग के पालन करे जाए। गरीब परिवार मन ल लॉक डाउन के समय कोनो प्रकार के दिक्कत झन होवय। ओ मन ल राशन आदि समय म मिलय।
महापौर मन ले चर्चा म मुख्यमंत्री ह कहिन कि नगरीय क्षेत्र मन म पानी, बिजली अऊ सफाई ले जुड़े कर्मचारी 24 घंटा उपलब्ध रहय। नगरीय क्षेत्र मन म कंट्रोल रूम घलोक नियमित रूप ले कार्यरत रहय। असहाय अऊ जरूरत मंद मन ल राशन के दिक्कत नइ होना चाही। राशन अऊ किराना दुकान, मेडिकल, सब्जी अऊ दूध आदि के दुकान तय समय सीमा तक खुलय। गरीब अऊ जरूरत मंद के सहायता बर स्वंय सेवी संगठन मन के मदद लेहे जाय। नगरीय क्षेत्र मन म अस्पताल म चिकित्सक अऊ स्टाफ के उपस्थिति के बराबर बिवस्था करे जाए। अस्पताल मन म जरूरी सुविधा अऊ साफ-सफाई सुनिश्चित करे जाय। राशन बर घर पहुंच सेवा संचालित करे जाय।