- ऊंखर क्षेत्र के लीन हालचाल अऊ 14 अप्रैल के बाद के स्थिति उपर करिन चर्चा
- लॉकडाउन के समय करे गए व्यवस्था मन के दीन जानकारी
- मुख्यमंत्री ह कहिन: गरीब अऊ कमजोर तबका के जरूरत के रखे जात हे विशेष ख्याल
रायपुर, 9 अप्रैल 2020। मुख्यमंत्री श्री भूपेश बघेल ह आज प्रतिपक्ष के नेता श्री धमरमलाल कौशिक, पूर्व मुख्यमंत्री डॉ. रमन सिंह, पूर्व मंत्री श्री बृजमोहन अग्रवाल, विधायक श्री धर्मजीत सिह, अऊ श्री मोहन मरकाम संग बहुत अकन विधायक मन ले दूरभाष म चर्चा करिन अऊ ऊंखर क्षेत्र के हालचाल जानिन अऊ लॉकडाउन के बेरा म प्रदेश म करे गए व्यवस्था मन के बारे म अऊ 14 अप्रैल के बाद के स्थिति उपर चर्चा करके ऊंखर सुझाव लीन। मुख्यमंत्री ह प्रदेश म कोरोना वायरस (कोविड19) के संक्रमण अऊ रोकथाम बर प्रदेश म लॉकडाउन के समय करे गए व्यवस्था मन उपर विस्तार ले चर्चा करिन।
मुख्यमंत्री ह बताइन के सबो वर्ग के हित के ख्याल रखे जात हे। राशन, दवई के संग सबो जरूरी व्यवस्था ल लॉकडाउन ले मुक्त रखे गए हे। मुख्यमंत्री ह बताइस के गरीब परिवार मन ल दू महिना के निःशुल्क राशन बांटे जात हे। ग्रामीण क्षेत्र मन म जरूरतमंद मन बर हरेक पंचायत म दू-दू क्विंटल अनाज रखे गए हे। एखर अलावा स्वयंसेवी संगठन अऊ औद्योगिक समूह मन के सहयोग ले भोजन के व्यवस्था करे जात हे। रायपुर शहर म डोनेशन आन व्हील्स अभियान चलाए जात हे। कोरोना वायरस के संक्रमण ल रोके बर गांव मन म घलोक सोशल डिस्टेंसिंग के पूरा पालन करे जात हे। कई गांव मन म बेरियर बनाके निगरानी रखे जात हे। रबी फसल के कटाई के समय घलोक सोशल डिस्टेंसिग के पालन करे ल कहे गए हे।
जरूरी वस्तु मन के आपूर्ति बर वाहन मन ल ऐप के माध्यम ले ई-पास के व्यवस्था करे गए हे। आन राज्य ले अवइया श्रमिक मन ल राज्य के सीमा के नजदीक ऊंखर बर भोजन अऊ घर के व्यवस्था करे गए हे। अइसनहे आन राज्य मन म फंसे श्रमिक मन ल सहायता मुहैया कराए जात हे। सबो कलेक्टर मन ल श्रमिक मन के भोजन, आवास संग आन जरूरी व्यवस्था बर संबंधित राज्य के कलेक्टर मन ले समन्वय करके जरूरी इंतजाम करे के निर्देश देहे गए हे। एखर अलावा आन जरूरत मन बर सहायता राशि ऊंखर खाता म भेजे जात हे।
मुख्यमंत्री ह बताइन के कोरोना वायरस के परीक्षण बर एम्स रायपुर के अलावा जगदलपुर म परीक्षण के व्यवस्था करे गए हे। एखर अलावा सबो जिला मन म कोरोना संक्रमण ले पीडि़त मनखे मन के इलाज बर सौ-सौ बेड के व्यवस्था करे जात हे। अंबेडकर स्मृति चिकित्सालय म 500 बेड अऊ माना सिविल अस्पताल म 100 बेड अऊ प्रदेश के आन मेडिकल कालेज मन म 200-200 बेड के व्यवस्था करे जात हे।
मुख्यमंत्री ह दुर्ग शहर के विधायक श्री अरूण वोरा, भिलाई नगर के विधायक श्री देवेन्द्र यादव, सिहावा के विधायक श्रीमती डॉ. लक्ष्मी ध्रुव, खुज्जी के विधायक श्रीमती छन्नी साहू, संजारी बालोद के विधायक श्रीमती संगीता सिन्हा, गुण्डर देही के विधायक श्री कुंवर सिंह निषाद, पंडारिया के विधायक श्रीमती ममता चंद्राकर, डोंगरगढ़ के विधायक श्री भुवनेश्वर बघेल, डोंगरगांव के विधायक श्री दलेश्वर साहू, मोेहला मानपुर के विधायक श्री इंद्रशाह मंडावी, भानुप्रतापपुर के विधायक श्री मनोज सिंह मंडावी, नारायणपुर के विधायक श्री चंदन कश्यप अऊ चित्रकोट के विधायक श्री राजमन बैंजाम ले चर्चा करिन।
