लॉकडाउन के सेती अपन कार्यालय म बाबा साहब के फोटू उपर करिन माल्यार्पण
रायपुर, 14 अप्रैल 2020। मुख्यमंत्री श्री भूपेश बघेल ह भारत के संविधान बनइया, महान समाज सुधारक, भारत रत्न डॉ. भीमराव अम्बेडकर ल आज उंखर 129वां जयंती म ओ मन ल विनम्र श्रद्धांजलि अर्पित करिन। कोविड-19 के बचाव अऊ रोकथाम बर लागू लॉकडाउन के सेती मुख्यमंत्री श्री बघेल ह अपन निवास कार्यालय कक्ष म संविधान बनइया बाबा साहब डॉ. भीमराव अम्बेडकर के फोटू उपर माल्यार्पण करके ओ मन ल श्रद्धांजलि अर्पित करिन अऊ भारत के संविधान निर्माण अऊ समता मूलक समाज के निर्माण, समाज के कमजोर वर्ग अऊ महिला सशक्तिकरण म ऊंखर योगदान ल सुरता करिन। उमन बाबा साहब कोति ले कमजोर तबका के शिक्षा, स्वावलंबन अऊ सम्मान के स्थापना बर करे प्रयास मन ल अऊ जादा विस्तार दे के संकल्प ल दोहराइन।
श्री बघेल ह संविधान बनइया डॉ. भीमराव अम्बेडकर के जयंती के पूर्व संध्या म काल प्रदेशवासी मन ल शुभकामना देवत कहे रहिन के छत्तीसगढ़ संग पूरा देश म बाबा साहब के लाखों अनुयायी बाबा साहब के जन्मदिन उत्साह अऊ श्रद्धा ले मनाथें। कोरोना वायरस (कोविड-19) के संक्रमण ल देखत सबो लाकडाउन के पालन करयं अऊ घर म बाबा साहब के जन्मदिन मनावयं। इही बाबा साहब ल हमर सिरतोन के पुष्पांजलि होही।
