बिलासपुर के कुरदर, कबीरधाम जिला के सरोधा दादर अउर कोण्डागांव के धनकुल म बने इको-एथनिक रिसॉर्ट
रायपुर, 13 अगस्त 2020/ मुख्यमंत्री श्री भूपेश बघेल 14 अगस्त के मंझनिया एक बजे अपन निवास कार्यालय म आयोजित कार्यक्रम म बिलासपुर जिला के कुरदर हिल इको रिसॉर्ट, कबीरधाम जिला के सरोधा दादर बैगा एथनिक रिसॉर्ट अऊ कोण्डागांव जिला म नवनिर्मित धनकुल एथनिक रिसॉर्ट के वीडियो कांफ्रेंसिंग के माध्यम ले ई-लोकार्पण करहीं। ’’ट्राइबल टूरिज्म सर्किट’’ स्वदेश दर्शन योजना के तहत ये टूरिस्ट रिसार्ट बनाय गए हे।
गृह, लोक निर्माण अऊ पर्यटन मंत्री श्री ताम्रध्वज साहू ए कार्यक्रम के अध्यक्षता करहीं। ए अवसर म छत्तीसगढ़ टूरिज्म बोर्ड कोति ले प्रदेश म बने कई ठन रिसोर्ट म केंद्रित प्रमोशनल वीडियो फिल्म के प्रदर्शन घलोक करे जाही कार्यक्रम म पर्यटन विभाग के सचिव श्री अन्बलगन पी. अऊ छत्तीसगढ़ टूरिज्म बोर्ड के प्रबंध संचालक श्रीमती इफ्फत आरा घलोक उपस्थित रइहीं।
छत्तीसगढ़ म स्वदेश दर्शन योजना के अंतर्गत ट्राईबल टूरिज्म सर्किट विकसित करे जात हे। एखर तहत पर्यटन स्थल मन म बुनियादी ढ़ांचा विकसित करे जात हे। पर्यटन ल बढ़ावा मिले ले स्थानीय मनखे मन बर रोजगार के अवसर बाढ़ही अऊ स्थानीय कला, संस्कृति, हस्तशिल्प ल घलोक बढ़ावा मिलही। छत्तीसगढ़ राज्य म पर्यटन ल बढ़ावा देहे के उद्देश्य ले ट्राइबल टूरिज्म सर्किट के अंतर्गत कुल 13 स्थान मन म 96 करोड़ के लागत ले ईको एथनिक टूरिस्ट रिसार्ट निर्मित कराए जात हे। जेमां जशपुर, कुनकुरी, मैनपाट, कमलेश्वरपुर (मैनपाट), महेशपुर, कुरदर, सरोधा दादर, गंगरेल (धमतरी), नथियानवागांव, कोण्डागांव, जगदलपुर, चित्रकोट अउर तीरथगढ़ सामिल हे। ए योजना के तहत कुरदर (बिलासपुर), सरोधा दादर (कबीरधाम) अउर धनकुल (कोण्डागांव) ईको एथनिक रिसार्ट के निर्माण पूरा कर ले गए हे। जेखर ई-लोकार्पण मुख्यमंत्री श्री भूपेश बघेल 14 अगस्त के करहीं।
