- हमर लक्ष्य सुपोषित छत्तीसगढ़ बनाना हे: मुख्यमंत्री श्री बघेल
- सुपोषण अभियान ले छै महिना म ही कुपोषित लइका मन म आईस 13 प्रतिशत के कमी
- मुख्यमंत्री ह करिन पोषण रथ के घलोक शुभारंभ
रायपुर, 08 सितंबर 2020। मुख्यमंत्री श्री भूपेश बघेल ह काली अपन निवास कार्यालय ले राष्ट्रीय पोषण महिना 2020 के ई-शुभारंभ करिन। उमन कहिन के एक सशक्त अऊ खुशहाल छत्तीसगढ़ के सपना जऊन हमार पुरखा मन ह देखे रहिन, ओ दिशा म हम पूरा ताकत ले काम करत हवन। हमर लक्ष्य सुपोषित छत्तीसगढ़ बनाना हे। ए बात ल धियान म रखत साल 2019 ले ही कुपोषण मुक्ति बर दंतेवाड़ा ले पॉयलेट प्रोजेक्ट के रूप म लइका अऊ महिला मन ल गरम भोजन देना शुरू करे गीस। एखर अपार सफलता के बाद पूरा प्रदेश मे 2 अकटूबर 2019 ले गांधी जी के 150वीं जयंती के अवसर म मुख्यमंत्री सुपोषण अभियान शुरु करे गीस।
मुख्यमंत्री श्री बघेल ह कहिन के छत्तीसगढ़ म 37 प्रतिशत लइका कुपोषित अऊ 47 प्रतिशत महिला मन एनीमिया ले पीड़ित हें। उमन कहिन के जऊन प्रदेश म लइका मन अऊ महिला मन के अतका बड़का संख्या कुपोषित हे, मै समझथंव के कुपोषण नक्सल ले घलोक बड़े समस्या हे। हमला सुपोषित छत्तीसगढ़ बनाना हे जेखर से अवइया पीढ़ी स्वस्थ्य अऊ खुशहाल रहय। उमन बताइन के सुपोषण अभियान बर महिला अऊ बाल विकास के मैदानी अमला के संगेच हमन प्रशासन के ताकत झोंक देहे हन। 2 अकटूबर ले लाकडाउन के पहिली तक मात्र छै महिना म ही 60 हजार ले जादा लइका कुपोषण मुक्त हो गीन, उहें प्रदेश म 13 प्रतिशत लइका कुपोषण ले बाहिर आए हें। मुख्यमंत्री ह कहिन के आंगनबाड़ी कार्यकर्ता मन अऊ मितानिन मन ह बहुत बढ़िया काम करे हें, उंखर निष्ठा अऊ सेवा भावना के सेती ये सुखद परिणाम मिले हे। उमन कहिन के कोरोना संकट के समय म घलोक ये अभियान ल पूरा ताकत ले चलाना हे। कोरोना अऊ कुपोषण द अलग-अलग मोर्चा म हमला लड़ाई लड़ना हे। उमन कहिन के प्रदेश म हमर आंगनबाड़ी म काम करइया बहिनी मन ह कोरोना काल म घलोक हितग्राही मन ल घर-घर जाके सूखा राशन वितरण करे हें।
राष्ट्रीय पोषण महिना के ई-शुभारंभ के बेरा म कृषि मंत्री श्री रविंद्र चौबे, महिला अऊ बाल विकास मंत्री श्रीमती अनिला भेंड़िया, संसदीय सचिव श्रीमती रश्मि आशीष सिंह, राज्य महिला आयोग के अघ्यक्ष श्रीमती किरणमयी नायक, कई ठन जिला मन म पोषण अभियान म सक्रियता ले काम करत सहयोगी विभाग मन के अधिकारी-कर्मचारी, स्वयंसेवी संस्था मन के प्रतिनिधि मन विभागीय अधिकारी-कर्मचारि मन, आंगनवाड़ी कार्यकर्ता मन, सहायिका, मितानिन मन के संग बहुत अकन जनप्रतिनिधि मन ह घलोक हिस्सा लीन। मुख्यमंत्री निवास ले अपर मुख्य सचिव श्री सुब्रत साहू, अपर मुख्य सचिव डॉ. आलोक शुक्ला, सचिव डॉ. एम.गीता, सचिव श्री आर. प्रसन्ना, श्री नीलेश क्षीरसागर संग आन वरिष्ठ प्रशासनिक अधिकारी घलोक सामिल होइन।
