महापौर अउ सभापति के कार्यभार ग्रहण कार्यक्रम म संघरे आए मुख्यमंत्री श्री भूपेश बघेल ह दीन संदेश
दुर्ग, जभे कोनो योजना बनावव, आखरी मनखे के चिंतन करव, गरीब अऊ कमजोर आदमी उपर आप के नीति के का प्रभाव परही। एकर से आप मन बर अपने-अपन रद्दा खुलत जाही अऊ निर्णय लेना सरल हो जाही। महात्मा गांधी जी इही संदेश देहे रहिन। मैं दुर्ग के विकास बर महापौर अउ उंखर टीम ल घलोक इही मंतर ल ध्यान म रखके नीति बनाए बर कहे आए हंव। ये संदेश मुख्यमंत्री श्री भूपेश बघेल ह दुर्ग निगम के नवनिर्वाचित महापौर श्री धीरज बाकलीवाल अउ सभापति श्री राजेश यादव के कार्यभार ग्रहण कार्यक्रम के अवसर म दीन। मुख्यमंत्री ह कहिन के आधारिक संरचना ले घलोक जरूरी हे अइसन नीति जेमां गरीब ल सुख मिलय, ओला आर्थिक संबल मिलय, वो अपन पांव म खड़े हो सकय। साल भर म हमर जम्मो नीति ओकरे उपर केंद्रित रहे हे। मुख्यमंत्री ह कहिन कि शहर मन म मजदूर पूरा समय रोजी मजदूरी म लगा देथे। ऊंखर मेर बेरा नइ होवे कि वो अस्पताल जा सकय। हमन मुख्यमंत्री शहरी स्वास्थ्य कार्यक्रम म अस्पताल ल चौंखट तक पहुंचा देन। हाट बाजार मन म हेल्थ कैंप शुरू कर देन। ये पइत बस्तर म बिकट बरसा होइस फेर उल्टी दस्त के सबले कम मामला आगू आइस।
मुख्यमंत्री ह अपन चेन्नई दौरा के बारे म घलोक बताइन। उमन कहिन के मोर से प्रभु चावला जी ह साक्षात्कार म पूछिन कि 2500 रुपए म धान खरीदी, कर्जमाफी अतना सब कइसे कर लेव। मैं ह ओ मन ल बतायेवं कि जब आप मन प्राथमिकता तय करथव त रद्दा खुलथे। हमार बर स्वीमिंग पुल जइसे अधोसंरचना मन के तुलना म किसान अऊ मजदूर के बेहतरी जादा मायने रखथे। एकर असर अर्थव्यवस्था म घलोक परथे। पूरा देश म मंदी हे फेर छत्तीसगढ़ म एकर असर नइ हे। आटोमोबाइल म 25 प्रतिशत बढ़ोत्तरी दर्ज करे गए हे। टैक्सटाइल 30 प्रतिशत के दर ले बढ़े हे। मुख्यमंत्री ह महापौर ले कहिन कि अभी सबले पहिली शहरी क्षेत्र म गौठान के काम शुरू कराव, फेर डाग हाउस घलोक बनाव। छोटे-छोटे सरोकार मन ले बड़े-बड़े काम मन के रद्दा खुलथे। स्वच्छता अऊ शहरी स्वास्थ्य सबले अहम विसय हे। नवा महापौर अऊ सभापति ऊर्जावान अऊ सक्रिय हें ओ मन खच्चित निगम ल नवा ऊँचाइ म ले जाहीं।
ये मौका म गृह मंत्री श्री ताम्रध्वज साहू ह कहिन कि दुर्ग ल नवा सिरा ले संवारे के बेरा आए हे। हमर महापौर अऊ वोखर टीम एला आगू ले जाही। सभा ल संबोधित करत कृषि मंत्री श्री रवींद्र चौबे ह कहिन कि मुख्यमंत्री ह प्रदेश बर जऊन गढ़बो नवा छत्तीसगढ़ के नारा देहे हे। ओखर असर दिखत हे। विकास के मतलब गगनचुंबी इमारत नइ होए, विकास के असल मतलब गरीब मन के बेहतरी ले हे। ये मौका म जिला के प्रभारी मंत्री श्री मोहम्मद अकबर ह कहिन कि प्रदेश के विकास के आधा बजट आम आदमी के बेहतरी बर खर्च होय हे। पांच डिसमिल ले कम जमीन के खरीद बिक्री म लगे रोक हटा दिए गए हे। टाटा के जमीन किसान मन ल वापस करे गए हे। अइसन आम जनता के सरोकार वाले काम मन ले प्रदेश म खुशहाली बाढ़े हे। ये मौका म विधायक श्री अरूण वोरा ह कहिन कि मुख्यमंत्री श्री भूपेश बघेल ह हमेशा दुर्ग शहर के विकास के गहिर चिंता करे हें अऊ कुछ समय पहिलिच 81 करोड़ रुपिया के काम मन के शुभारंभ कराए हें।
महापौर श्री धीरज बाकलीवाल ह ये मौका म अपन प्राथमिकता बतात कहिन कि शहर के सुंदरता अऊ स्वच्छता ल लेके पूरा मनोयोग ले काम करहीं। ठगड़ा बांध ल स्तरीय पिकनिक स्पाट के रूप म विकसित करहीं। दुर्ग शहर ल संवारहीं अऊ जनता के आंकाक्षा मन म पूरा खरा उतरे बर पूरा मनोयोग ले काम करहीं। ये मौका म पूर्व विधायक श्री प्रदीप चौबे, श्रीमती प्रतिमा चंद्राकर, श्री भजन सिंह निरंकारी, पूर्व महापौर श्रीमती चंद्रिका चंद्राकर, श्री शंकरलाल ताम्रकार अउ आन जनप्रतिनिधि अऊ पार्षदगण उपस्थित रहिन। ये बेरा म संभागायुक्त श्री दिलीप वासनीकर, आईजी श्री विवेकानंद सिन्हा, कलेक्टर श्री अंकित आनंद, एसपी श्री अजय यादव, जिला पंचायत सीईओ श्री कुंदन कुमार, नगर निगम कमिश्नर श्री इंद्रजीत बर्मन अऊ आन अधिकारी उपस्थित रहिन।
