रायपुर, 27 अप्रैल 2020। मुख्यमंत्री श्री भूपेश बघेल ह प्रदेश के रायगढ़, जशपुर, सूरजपुर जिला संग सरगुजा, बिलासपुर संभाग के आन जिला मन म आंधी-तूफान अउ करा गिरे के संबंध म संबंधित जिला मन के जनप्रतिनिधि अउ कलेक्टर मन ले दूरभाष म चर्चा करके स्थिति के जानकारी लीन। उमन आंधी-तूफान, करा गिरे के सेती जान-माल संग फसल के नुकसान के सर्वे अउ आंकलन करके पीड़ित मन ल तुरंते राहत पहुंचाए के निर्देश देहे हें।
मुख्यमंत्री श्री भूपेश बघेल के हुकुम म सूरजपुर जिला के ग्राम भरवाही के 6 बेघर परिवार ल फिलहाल शिवप्रसाद नगर के छात्रावास म अस्थाई तौर म रूकवा के ऊंखर भोजन के निःशुल्क व्यवस्था जिला प्रशासन कोति ले कर देहे गए हे। जानबा हे के 25 अप्रैल सनिच्चर के रात सूरजपुर जिला म आए भीषण आंधी तूफान के सेती 6 गांव वाले मन के घर टूट गए। जिला प्रशासन ह ए बेघर परिवार के सबो सदस्य मन ल छात्रावास म आश्रय प्रदान करे के संगेच ऊंखर भोजन के व्यवस्था करे गए हे। कलेक्टर श्री दीपक सोनी ह ग्राम भरवाही संग तीर-तखार के गांव मन के दौरा करके आंधी तूफान अऊ ओलावृष्टि ले होए नुकसान के जायजा लीन। ये बेरा म पीड़ित परिवार मन ले घलोक उमन मुलाकात करिन अऊ कहिन के शासन-प्रशासन कोति ले ओ मन ल हर संभव मदद देहे जाही। कलेक्टर ह राजस्व अउ कृषि विभाग के अधिकारी मन ल आंधी तूफान अऊ ओलावृष्टि के सेती होए नुकसान के तुरंत सर्वे करके पीड़ित मन ल राहत मुहैया कराए बर प्रकरण तियार करे के निर्देश घलोक देहे हें। जिला के विद्युत विभाग, लोक स्वास्थ्य यांत्रिकी अउ आन विभाग मन के अधिकारी मन ल घलोक युद्ध स्तर म राहत काम संचालित करके जिला म सामान्य स्थिति बहाल करे के निर्देश देहे हें।
