रायपुर, 04 मार्च 2024। मुख्यमंत्री कन्या विवाह योजना के तहत इतवार के कवर्धा के सरदार पटेल मैदान म सामाजिक रीति-रिवाज के संग 290 जोड़ा के बिहाव होइस। ए बेरा म उपमुख्यमंत्री श्री विजय शर्मा अऊ महिला अउ बाल विकास विभाग मंत्री श्रीमती लक्ष्मी राजवाड़े ह विवाह कार्यक्रम म सामिल होके नव-दाम्पत्य जीवन म प्रवेश करत वर-वधु मन ल आशीर्वाद दीन। ए मौका म उमन विवाहित जोड़ा मन ल 21-21 हजार रूपिया के चेक घलोक दीन।
कार्यक्रम म उपमुख्यमंत्री श्री विजय शर्मा ह कहिन कि मुख्यमंत्री कन्या विवाह योजना ले आर्थिक रूप ले कमजोर परिवार के अभिभावक अऊ बेठी के के पिता के चिंता दूर होवत हे। अवइया समय म सामूहिक विवाह ल अऊ आगू बढ़ाबो जेखर से जादा ले जादा बेटी मन के शादी हो सकय। मंत्री श्रीमती लक्ष्मी राजवाड़े ह नव विवाहित जोड़ा मन ल बधाई देवत कहिन कि समाज म वैवाहिक खर्च म कमी लाय बर मुख्यमंत्री कन्या विवाह योजना बहुत कारगर हे। ए योजना के लाभ सामाज के आर्थिक रूप ले कमजोर सबो परिवार ल लेना चाही। प्रदेश के कई समाज अब सामूहिक विवाह ल प्रोत्साहित करत हे। ये मां अनावश्यक खर्च म कमी होथे अऊ माता-पिता उपर अकतहा भार घलोक नइ आवय। एखर से मुख्यमंत्री कन्या विवाह योजना ल घलोक प्रोत्साहन मिलत हे। उमन बेटी मन के शिक्षा उपर जोर देवत कहिन कि बेठी मन ल शिक्षा ले वंचित झन करव, काबर के बेठी शिक्षित होथे, त शादी के बाद दू परिवार ल शिक्षित करथे। ए अवसर म जिला पंचायत अध्यक्ष श्रीमती सुशीला रामकुमार भट्ट संग कई जनप्रतिनिधि, वरिष्ठ प्रशासनिक अधिकारी अऊ गणमान्य नागरिक उपस्थित रहिन।
मुख्यमंत्री कन्या विवाह योजना: सामाजिक रीति-रिवाज ले 290 जोड़ा के होइस बिहाव
