6 महिना ले बंद हैंडपंप होइस चालू, लीलापुर के गांव वाले मन ल फेर मिलिस स्वच्छ पेयजल की सुविधा
मुंगेली, शासन के संवेदनसील अउ जवाबदेह काम करे के तरीका के एक मजबूत माध्यम बन चुके मुख्यमंत्री हेल्पलाइन 1076 आम लोगन मन के समस्या के तुरते समाधान के भरोसा मंद मंच बनके आगू आवत हे। मुंगेली जिला के लोरमी विकासखंड के लीलापुर गांव के रहइया श्री दिनेश कुमार के पहल अउ प्रशासन के तुरते कारवाही ले लीलापुर गांव के वार्ड नंबर-16 म 6 महीना से खराब परे हैंडपंप ला सुधार के पानी के ब्यवस्था ला दुरस्त करे गीस। हैंडपंप खराब होय के सेती गॉव म पानी के बड़का संकट रहिस। गॉव वाले मन ला रोज के जरूरत बर दूर-दूर से पानी लाना परत रहिस, जेकर से ओमन ला भारी दुख उठाना परत रहिस।
ए समस्या के समाधान बर गॉव के रहइया श्री दिनेश कुमार हा मुख्यमंत्री हेल्पलाइन 1076 के माध्यम से सिकायत दरज कराइस। अरजी मिलतेच लोक स्वास्थ्य यांत्रिकी विभाग हा ए मामला ला गंभीरता से लेवत तुरते कारवाही सुरु कर दीस। विभाग के तकनीकी टीम हा मउका म पहुंच के हैंडपंप के जांच करिस अउ जरूरी मरम्मत के काम ला पूरा करिस। सिकायत दरज होय के सिर्फ 3 दिन के भितरी हैंडपंप ला फेर चालू कर दे गीस। एकर बाद वार्ड के जम्मो परिवार मन ला फेर साफ पानी के सुबिधा मिले लग गे, जेकर से लंबा समय से चले आवत समस्या के पक्का समाधान हो गे। दिनेश कुमार हा बताइस के मुख्यमंत्री हेल्पलाइन के माध्यम से ओकर सिकायत के तुरते निराकरण होइस, जेकर से पूरा वार्ड के लोगन मन ला राहत मिलीस। ओमन मुख्यमंत्री श्री विष्णुदेव साय, जिला प्रशासन अउ लोक स्वास्थ्य यांत्रिकी विभाग कोति आभार जतावत कहिन के ए ब्यवस्था हा आम नागरिक मन के समस्या के तुरते समाधान बर एक बड़ असरदार माध्यम बन चुके हे।