रायपुर, 13 मार्च 2020। मुख्यमंत्री श्री भूपेश बघेल ह आज रंगपंचमी के पावन अवसर म राजनांदगांव जिला के डोंगरगढ़ स्थित मां बम्लेश्वरी मंदिर के छिरपानी प्रांगण म नवनिर्मित मां बम्लेश्वरी उड़न खटोला (रोप-वे) के लोकार्पण करिन। मुख्यमंत्री अतिथि मन के संग रोप-वे ले पहाड़ी म स्थित मां बम्लेश्वरी मंदिर पहुंचिन। उहां उमन पूजा-अर्चना करके प्रदेश के प्रगति, समृद्धि अऊ खुशहाली के आशीर्वाद मांगिन।
कार्यक्रम के अध्यक्षता श्री वन मंत्री मोहम्मद अकबर ह करिन। कार्यक्रम म विशिष्ट अतिथि गृह मंत्री श्री ताम्रध्वज साहू, विधायक डोंगरगढ़ श्री भूनेश्वर शोभाराम, विधायक श्रीमती संगीता सिन्हा संग बहुत अकन जनप्रतिनिधि अऊ बड़ी संख्या म श्रद्धालु उपस्थित रहिन। मुख्यमंत्री ह ये बेरा म कहिन कि अब इहां एक नगर पालिका के अऊ एक मंदिर ट्रस्ट के रोप-वे रहिस हे। दो रोप-वे होए ले इहां अवइया श्रद्धालु मन ल दर्शन करे म बने सुविधा होही। इहां लाखों के संख्या म हर साल श्रद्धालु आथें। उंखर सुविधा बर ये व्यवस्था करे गए हे।
हम आप ल बता देवन के अत्याधुनिक रोप-वे के चालू होए ले मां बम्लेश्वरी के दर्शन बर अवइया श्रद्धालु मन ल एक अच्छा सुविधा मिलही। दर्शन म लगइया समय के बचत होही, उहें बुजुर्ग अऊ दिव्यांग मन ल घलोक आसानी होही। ये रोप-वे बर 8 करोड रूपिया के लागत आये हे। रोप-वे म 14 ट्रालि लगाए गए हे। एक घंटा म अब 500 श्रद्धालु मां के दर्शन करे पहाड़ी म जा सकहीं। ये रोप-वे अत्याधुनिक अऊ पूरा कम्प्यूटरीकृत प्रणाली ले संचालित हे। ये रोप-वे विद्युत अऊ डीजल ले चलही। दर्शनार्थि मन बर पहाड़ी के नीचे अऊ ऊपर के हिस्से म तीन मंजिला हाल बनाए के काम घलोक करे जात हे। नवा सुविधा अऊ रोप-वे के निर्माण ले ये पूरा क्षेत्र म पर्यटन ल एक नवा आयाम मिलही।