हरदिहा साहू समाज कोति ले आयोजित सामूहिक आदर्श विवाह समारोह म सामिल होइन मुख्यमंत्री
रायपुर, 13 मार्च 2020। मुख्यमंत्री श्री भूपेश बघेल आज बालोद जिला के गुरूर विकासखण्ड के ग्राम डढ़ारी म छत्तीसगढ़ हरदिहा साहू समाज कोति ले आयोजित प्रदेश स्तरीय सामूहिक आदर्श विवाह समारोह म सामिल होइन। उमन समारोह म 57 नवविवाहित दम्पत्ति मन ल सुखी वैवाहिक जीवन बर आर्शीवाद दीन।
मुख्यमंत्री ह समारोह ल सम्बोधित करत कहिन कि हरदिहा साहू समाज के सामूहिक आदर्श विवाह प्रशंसनीय हे अऊ आन समाज बर अनुकरणीय हे। मुख्यमंत्री ह किसान मन ले कहिन कि ओ मन खेत मन म पैरा बिल्कुल ढन जलावयं, बल्कि गौठान म पैरा दान करयं। उमन गांव वाले मन ल गॉव म गौठान निर्माण बर प्रोत्साहित करिन। उमन किसान मन ले कहिन कि ओ मन गन्ना के भरपूर उत्पादन करके अपन आमदनी बढ़ावयं।
मुख्यमंत्री श्री बघेल ह कहिन कि पूरा दुनिया म कोरोना वायरस के प्रकोप हे। अड़बड़ झन मनखे एखर से प्रभावित हे। अभी तक एखर कोनो दवई नइ निकले हे। उमन कहिन कि कोराना वायरस ले बचाव म ही सुरक्षा हे। प्रदेश के गृह, जेल, लोक निर्माण मंत्री श्री ताम्रध्वज साहू ह समारोह ल संबोधित करके नवविवाहित दम्पत्ति मन ल सुखी वैवाहिक जीवन बर शुभकामना अउ आशीर्वाद दीन। ये बेरा म छत्तीसगढ़ साहू समाज के तरफ ले भक्त माता कर्मा जयंती म अवकाश के घोषणा म मुख्यमंत्री के प्रति आभार व्यक्त करिन।
समारोह ल वनमंत्री मोहम्मद अकबर अऊ संजारी-बालोद विधायक श्रीमती संगीता सिन्हा ह घलोक सम्बोधित करके नवविवाहित दम्पत्ति मन ल सुखी वैवाहिक जीवन बर आर्शीवाद दीन। ये बेरा म हरदिहा साहू समाज के बहुत अकन पदाधिकारी, वर-वधु मन के परिजन अऊ अड़बड़ झन म समाज के सदस्य संग वरिष्ठ प्रशासनिक अधिकारी उपस्थित रहिन।