महासमुंद म मुख्यमंत्री कन्या विवाह योजना म 250 जोड़ा के होईस बिहाव

महासमुंद, महासमुंद के संजय कानन म मुख्यमंत्री कन्या विवाह योजना के तहत 250 जोड़ा के बिहाव होइस। ये बेरा म संसदीय सचिव अउ विधायक श्री विनोद चंद्राकर, कलेक्टर श्री निलेशकुमार क्षीरसागर ह नवविवाहित जोड़ा ल आशीर्वाद देहे के संग सुखी दाम्पत्य के शुभकामना घलोक दीन अऊ उपहार भेंट करिन। उमन कहिन कि निर्धन कन्या मन बर मुख्यमंत्री कन्या विवाह योजना वरदान हे। ये योजना के माध्यम ले फिजुल खर्च अउ दहेज प्रथा जइसे कुरीति मन ल खतम करे के एक अच्छा माध्यम हे। अब अइसन कन्या मन के माता-पिता ल आर्थिक समस्या के सामना नइ करना परय। ज़िला कार्यक्रम अधिकारी महिला अउ बाल विकास श्री समीर पाण्डे ह बताइस कि आज मुख्यमंत्री कन्या विवाह योजना म आज 250 जोड़ा विवाह बंधन म बंधिन। ये बेरा म ज़िला पंचायत अध्यक्ष श्रीमती ऊषा पटेल, अध्यक्ष नगरपालिका श्रीमती राशि महिलांग, रश्मि चंद्राकर, स्काउट गाइड के जिलाध्यक्ष श्री दाऊलाल चन्द्राकर, गणमान्य नागरिक उपस्थित रहिन।