मुख्यमंत्री ह करिस ई-पास एनराइड एप के शुभारंभ : अतिआवश्यक सेवा प्रदाता मन के आवागमन म होही सुविधा

जिला प्रशासन ह बनाइस सी.जी. कोविड-19 ई-पास एप

रायपुर, 03 अप्रैल 2020। मुख्यमंत्री श्री भूपेश बघेल ह आज राजधानी रायपुर के माना केम्प स्थित शासकीय वृद्धाश्रम म जिला प्रशासन कोति ले रायपुर स्मार्ट सिटी लिमिटेड अऊ नगर निगम के सहयोग ले बनाय गए सी.जी. कोविड-19 “ई-पास“ एनराइड ऐप के शुभारंभ करिन।
एखर जरिए 22 प्रकार के जरूरी सेवा के परिवहन म लगे सेवा प्रदाता मन ल ऑनलाइन आवागमन के स्वीकृति आसानी ले मिल सकही। ये ऑनलाइन सिसटम ले रायपुर शहर के भीतर संग छत्तीसगढ़ के आन शहर अऊ जिला मन म आए-जाए बर जरूरी प्रशासनिक स्वीकृति घर बइठे मिल सकही।

कोविड-19 ई-पास के अनुमति के पूरा प्रक्रिया बहुत सरल हे। एखर बर https://rebrand-ly/z9k75qp कड़ी म जाके कोविड-19 ई-पास एप्प डाउनलोड करके एला इंस्टॉल करना होही। इंस्टॉल करे के बाद अपन मोबाईल नं. अउ ओटीपी दर्ज करके अपन आवेदन पत्र पूरा करना होही। आवेदन के संग आधार कार्ड अउ वाहन के नंबर घलोक दर्ज करना जरुरी होही। ये ई-फार्म म आवेदक ल फोटो अउ पहिचान पत्र अउ सेवा प्रदाता प्रमाण घलोक अपलोड करना अनिवार्य होही। भरे फार्म ल पुलिस विभाग गुण-दोष के आधार म स्वीकृत या अस्वीकृत करही। सड़क म मौजूद पुलिस कर्मचारी ये एप्प के माध्यम ले स्वीकृत आवेदन मन के सत्यापन घलोक अपन मोबाईल के संग तुरंते कर सकहीं।

ये ई-पास सब्जी, दूध, फल, दवा, अनाज के दुकान, पेट्रोल पंप अउ बैंक कर्मी मन बर अति उपयोगी हे, जिंनला जरूरी सेवा प्रदाता के रुप म आवागमन के स्वीकृति जरूरी हावय। एक शहर के भीतर या एक ले दूसर म जाय बर ये पास वैधानिक अनुमति के रुप म होही अउ यात्रा करइया स्वीकृति प्राप्त होए के बाद कोनो असुविधा नइ होही।

ये बेरा म पूर्व जिला पंचायत सदस्य श्री पंकज शर्मा, समाज कल्याण विभाग के सचिव श्री आर प्रसन्ना, संचालक श्री पी दयानंद, कलेक्टर श्री एस. भारती दासन, वरिष्ठ पुलिस अधीक्षक श्री आरिफ शेख मोहम्मद संग बहुत अकन विभागीय अधिकारी घलोक उपस्थित रहिन। मुख्यमंत्री ह ये ऐप के आडियो विडियो प्रजेन्टेशन के अवलोकन करिन।