जनसेवा म हमसा आगू रहे हे जैन समाज: मुख्यमंत्री श्री भूपेश बघेल

मुख्यमंत्री ह करिस जीतो कोविड सेन्टर के शुभारंभ

रायपुर, 16 सितम्‍बर 2020। मुख्यमंत्री श्री भूपेश बघेल ह आज इहां अपन निवास कार्यालय ले वीडियो कॉन्फ्रेसिंग के संग जीतो कोविड सेन्टर के शुभारंभ करिन। जैनम मानस भवन रायपुर म कोरोना पीड़ित मन के इलाज बर ये सर्वसुविधायुक्त कोविड सेन्टर जीतो (जैन इन्टरनेशनल ट्रेड आर्गनाइजेशन) अऊ छत्तीसगढ़ शासन के सहयोग ले चालू करे गीस। रायपुर के एयरपोर्ट के तीर स्थित ये कोविड सेन्टर म 200 बिस्तर के व्यवस्था हे। इहां कोविड के मरीज मन के बेहतर इलाज बर विशेषज्ञ चिकित्सक मन के टीम के अलावा भोजन आदि के निःशुल्क प्रबंध हे। जीतो कोविड सेन्टर के शुभारंभ कार्यक्रम म मंत्री श्री रविन्द्र चौबे, श्री टी.एस.सिंहदेव, श्री मोहम्मद अकबर, डॉ. प्रेमसाय सिंह टेकाम, डॉ. शिवकुमार डहरिया, श्री अमरजीत भगत, विधायक श्री सत्यनारायण शर्मा संग आन जनप्रतिनिधि वीडियो कॉन्फ्रेसिंग के माध्यम ले सामिल होइन।

मुख्यमंत्री श्री भूपेश बघेल ह जीतो कोविड सेन्टर के वर्चुअल शुभारंभ करत जीतो के सबो पदाधिकारी मन ल बधाई अऊ शुभकामना दीन। मुख्यमंत्री ह कहिन के जैन समाज सेवा के मामला म हमेशा ले आगू रहे हे। करोना संकट काल म कोविड के मरीज मन बर सर्वसुविधायुक्त सेन्टर के व्यवस्था करके जीतो ह जन सेवा अऊ सहभागिता के भावना ल आगू बढ़ाए हे। मुख्यमंत्री ह कहिन के जैन समाज अऊ जीतो के ये सेवाभाव ल देखके आन समाज के मनखे घलोक आगू आहीं। उमन कहिन के जीतो के पहल ले हम कोविड के लड़ाई म एक कदम अऊ आगू बढ़े हन। समाज के सबो वर्ग के सहयोग ले कोविड के लड़ाई हम जरूर जीतबोन। मुख्यमंत्री ह आगू कहिन के कोविड के वैश्विक बीमारी ह हम सबो ल अऊ हर व्यवस्था ल प्रभावित करे हे। उमन कहिन के मै नइ समझंव के कोनो महामारी एखर से पहिली दुनिया ल अतका व्यापक पैमाना म प्रभावित करे होवय।