- मजदूर भाई-बहिनी मन ल मिठाई खवा के अऊ कम्बल भेंट करके नवा बछर के खुसी बांटिन
- नवा बछर म मुख्यमंत्री ह मजदूर मन बर करिन बड़का घोषणा
- श्रमवीर मन बर शुरू होही मुख्यमंत्री निर्माण मजदूर मृत्यु अउ दिव्यांग सहायता योजना
- काम के बेरा म मजदूर के मृत्यु म एक लाख अऊ दिव्यांगता म 50 हजार रूपिया के सहायता
- निर्माण अऊ असंगठित क्षेत्र के 36 लाख पंजीकृत मजदूर होहीं लाभान्वित
रायपुर, मुख्यमंत्री श्री भूपेश बघेल ह आज राजधानी रायपुर के गांधी मैदान म राष्ट्रपिता महात्मा गांधी के प्रतिमा उपर पुष्पांजलि अर्पित करके नवा बछर 2020 के शुरूआत करिन। मुख्यमंत्री एखर बाद कोतवाली तिर चावड़ी म मेहनतकश मजदूर भाई-बहिनी मन ल मिठई खवा के अऊ कम्बल भेंट करके ऊंखर संग नवा बछर के खुसी बांटिन। मुख्यमंत्री श्री बघेल ह प्रदेशवासी मन ल नवा बछर के बधाई देवत ये मौका म प्रदेश के श्रमवीर मन बर एक नवा योजना चालू करे के घोषणा घलोक करिन।
ये मा पंजीकृत मजदूर के काम के बेरा मृत्यु होए म परिवार ल एक लाख रूपिया अऊ दिव्यांगता म 50 हजार रूपिया के आर्थिक सहायता मुहैया कराए जाही। प्रदेश के ग्रामीण क्षेत्र मन म ये योजना पंचायत चुनाव के आचार संहिता खतम होए के बाद प्रभावशील होही।
ये बेरा म विधायक श्री मोहन मरकाम संग बहुत अकन जनप्रतिनिधि, श्रमायुक्त श्री सुबोध सिंह उपस्थित रहिन।
श्रम विभाग के अधीन छत्तीसगढ़ भवन अउ आन सन्निर्माण कर्मकार कल्याण मण्डल म पंजीकृत निर्माण मजदूर मन ल मुख्यमंत्री विश्वकर्मा निर्माण मजदूर मृत्यु अउ दिव्यांग सहायता योजना अऊ छत्तीसगढ़ असंगठित कर्मकार राज्य सामाजिक सुरक्षा मण्डल म पंजीकृत असंगठित मजदूर मन बर मुख्यमंत्री असंगठित कर्मकार मृत्यु अउ दिव्यांग सहायता योजना शुरू करे जाही। ए योजना मन म 18 ले 60 आयु वर्ग के निर्माण अउ असंगठित मजदूर लाभान्वित होहीं। मादक द्रव्य पदार्थ के सेवन, एक-दूसर ल मारपीट अऊ आत्महत्या म होए मृत्यु म ये सहायता नइ मिलय।
निर्माण मजदूर मन ले संबंधित राशि छत्तीसगढ़ भवन अउ आन सन्निर्माण कर्मकार मण्डल कोति ले देहे जाही अऊ असंगठित मजदूर मन ले संबंधित राशि असंगठित कर्मकार मण्डल ल राज्य बजट ले देहे जाही।
