मुख्यमंत्री मितान योजना ले आम नागरिक मन ल मिले लगिस लाभ

अब तक 12 आवेदक मन ल मिल गे योजना के लाभ, होवत हे सराहना

धमतरी, मुख्यमंत्री मितान योजना ले नागरिक मन ल घर बइठे नागरिक सेवा मिले ल शुरू हो गए हे। योजना के तहत आए आवेदन मन म बिना देरी के प्राथमिकता के आधार म कार्रवाई करे जात हे। नगर निगम धमतरी के आमापारा वार्ड निवासी सुबोध महावर धमतरी शहर ले ये योजना के पहिली आवेदक बने रहिस, जे ह अपन बेटा के जन्म प्रमाण पत्र बर टोल फ्री नंबर 14545 म कॉल करके आवेदन करे रहिस अऊ आवदेन के एक घंटा के भीतर ही वोकर घर म महापौर श्री विजय देवांगन ह आके वोकर प्रमाण-पत्र ल देहे रहिस, जेन बात ह पूरा शहर म चर्चा के विसय बने रहिस।
मुख्यमंत्री मितान योजना ले नागरिक सेवा मन के लाभ उठाए बर सदर दक्षिण निवासी प्रदीप कोसरिया ह अपन बेटा रित्विक कोसरिया बर जन्म प्रमाण पत्र आवेदन करिस, दूसरेच दिन कलेक्टर श्री पी एस एल्मा खुदे मितान बनके वोकर घर पहुँचके प्रमाण पत्र सौंपिस। ये तात्कालिक सेवा ले कोसरिया परिवार हर्षित होए हे। अइसनहे अब तक 12 नागरिक मन ल घर पहुंच सेवा मिले हे। जेमे 7 जन्म प्रमाण पत्र, 2 मृत्यु प्रमाण पत्र, 2 विवाह प्रमाण पत्र अऊ एक जन्म प्रमाण पत्र सुधार सामिल हे। लाभार्थी आवेदक मन ह मुख्यमंत्री मितान योजना ले मिले प्रमाण पत्र के लाभ घर म अपन सुविधाजनक समय म मिले ले प्रसन्नता व्यक्त करत मुख्यमंत्री भूपेश बघेल के प्रति आभार व्यक्त करे हें। उमन कहिन कि पहिली जन्म प्रमाण पत्र मृत्यु प्रमाण पत्र विवाह प्रमाण पत्र जइसे आन आवेदन मन बर अड़बड़ समय लगत रहिस अऊ कार्यालय के चक्कर काटे ल पड़त रहिस। मुख्यमंत्री मितान योजना के शुरू हो जाय ले शासकीय सेवा मन के लाभ मनखे मन ल घर बइठे मिले लगे हे। एखर से आम नागरिक मन ल सेवा सहजता ले सुलभ होए लगे हे।