प्रमाण पत्र बर भागदौड़ करे के जरूरत नही, अब मनखे मन ल मिलत हे घर पहुंच सेवा
राजनांदगांव, मुख्यमंत्री मितान योजना ले मनखे मन ल कई ठन काम मन बर प्रमाण पत्र अब घर बइठेच मिलत हे। छत्तीसगढ़ सरकार कोति ले शुरू करे गए ये योजना के जरीए अभी हाल म 13 सेवा मन ल सामिल करे गए हे। योजना ले विशेषकर महिला, बुजुर्ग अउ दिव्यांगजन मन संग आन जरूरत मंद मनखे मन बर ये सुविधा फायदेमंद सिद्ध होवत हे। जानबा हे कि मुख्यमंत्री श्री भूपेश बघेल ह 1 मई 2022 ले मुख्यमंत्री मितान योजना चालू करे रहिन। ये योजना पहिली चरण म प्रदेश के नगर निगम क्षेत्र मन म संचालित करे जात हे।
मितान योजना के अंतर्गत राजनांदगांव जिला के बर्फानी मार्ग निवासी श्रीमती इंदु यादव ह अपन दुकान अउ स्थापना ले संबंधित पंजीयन के प्रमाण पत्र ये योजना के तहत मितान ले प्राप्त करिस। श्रीमती इंदु यादव ह बताइस कि मुख्यमंत्री के ये योजना बहुत अच्छा हे। जेखर से घरे म ही जरूरी प्रमाण पत्र मिलत हे। वो ह कहिस कि आगू घलोक ये योजना के लाभ लेंही। अइसनहे अभय श्रीवास्तव ह कहिस कि वो ह अपन 4 महिना के नोनी शुभांषी श्रीवास्तव बर जन्म प्रमाण पत्र ये योजना के अंतर्गत बनवाए हे। शासन के ये योजना बहुत अच्छा योजना हे। अब जन्म प्रमाण पत्र अऊ आन जरूरी प्रमाण पत्र बर भागदौड़ करे के जरूरत नइ हे अऊ मनखे मन ल घर पहुंच सेवा मिलत हे।
अइसनहे ममता नगर राजनांदगांव के योगेश कुमार साहू ह अपन बेटा अनिकेत साहू के जन्म प्रमाण पत्र पाइस, मितान ह वोखर घर जाके प्रमाण पत्र दीस। रामाधीन मार्ग स्थित अमन बावनकर ल वोखर दुकान अउ स्थापना पंजीयन ले संबंधित प्रमाण पत्र के जरूरत रहिस, जेन ल मितान ह वोखर घर जाके इीस।
मितान विनय साहू ले पूछे म बताइस के सेवा के ये काम के माध्यम ले हमला बहुत कुछ सीखे ल मिलत हे। पूरा ऊर्जा अउ लगन के संग ओ ह ये काम करत हे। मितान विशाल साहू घलोक वोखर संग ये काम ले जुड़े हे।
नगरीय प्रशासन विभाग के मुख्यमंत्री मितान योजना के अंतर्गत नागरिक मन ल असली निवास प्रमाण पत्र, जाति प्रमाण पत्र, आय प्रमाण पत्र, कागद मन के नकल अऊ डिजिटाइल्ड (भूमि रिकार्ड के प्रति) मृत्यु प्रमाण पत्र, विवाह पंजीकरण अऊ प्रमाण पत्र, जन्म प्रमाण पत्र सुधार, मृत्यु प्रमाण पत्र सुधार, विवाह प्रमाण पत्र सुधार आदि सेवा प्रदान करे जात हे। योजना के पहिली चरण म प्रदेश के 14 नगर निगम म मनखे मन ल योजना के तहत लाभान्वित करे जात हे। लउहेच पूरा प्रदेश म एकर विस्तार करे जाही। शासन के करीब एक सौ सेवा ये योजना के तहत नागरिक मन ल प्रदान करे के योजना हे।