- मुख्यमंत्री श्री बघेल ह वरिष्ठ पत्रकार श्री ई.वी.मुरली ल ’वसुंधरा सम्मान’ ले करिन सम्मानित
वसुंधरा पत्रिका के 49वां अंक के लोकार्पण
रायपुर, 14 अगस्त 2020। मुख्यमंत्री श्री भूपेश बघेल ह आज इहां अपन निवास कार्यालय म आयोजित छोटकन गरिमामय समारोह म वरिष्ठ पत्रकार अऊ अंगरेजी दैनिक ‘हितवाद’ के स्थानीय सम्पादक श्री ई. वी. मुरली ल 20 वां ’वसुंधरा सम्मान’ ले सम्मानित करिन। स्वर्गीय श्री देवी प्रसाद चौबे के स्मृति म स्थापित ये सम्मान पाछू 20 बछर ले लोकजागरण बर देहे जात हे। वसुंधरा सम्मान समारोह के आयोजन स्वर्गीय श्री देवी प्रसाद चौबे के पुण्यतिथि के अवसर म करे जाथे। मुख्यमंत्री ह श्री मुरली ल शॉल, श्रीफल अऊ प्रशस्ति पत्र दे के सम्मानित करिन। कार्यक्रम के सुरू म मुख्यमंत्री श्री बघेल ह स्वर्गीय श्री देवी प्रसाद चौबे के फोटू म माल्यार्पण करके ओ मन ल श्रद्धांजलि अर्पित करिन।
समारोह के अध्यक्षता संस्कृति मंत्री श्री अमरजीत भगत ह करिन। लोक स्वास्थ्य यांत्रिकी मंत्री श्री गुरू रूद्र कुमार, विधायक श्री मोहन मरकाम, स्वर्गीय देवीप्रसाद चौबे के पुत्र श्री प्रदीप चौबे, कृषि मंत्री श्री रविन्द्र चौबे, वरिष्ठ पत्रकार श्री रमेश नैयर, छत्तीसगढ़ राज्य वेयर हाउसिंग कार्पोरेशन के अध्यक्ष श्री अरूण वोरा, इंदिरा कला अउर संगीत विश्वविद्यालय खैरागढ़ के कुलपति श्रीमती ममता चंद्राकर, सेवानिवृत्त आईएएस अधिकारी श्री बी.के.एस.रे, साहित्यकार अऊ वरिष्ठ पत्रकार श्री गिरीश पंकज अऊ श्री दिवाकर मुक्तिबोध, मुख्यमंत्री के सलाहकार श्री रूचिर गर्ग ये बेरा म उपस्थित रहिन। संस्कृति विभाग छत्तीसगढ़ शासन अऊ श्री चतुर्भुज मेमोरियल फाउन्डेशन के सहयोग ले लोकजागरण के पत्रिका ‘वसुंधरा’ कोति ले ये समारोह के आयोजन करे गीस।
मुख्यमंत्री ह देश अऊ समाज बर पत्रकार मन के योगदान के चर्चा करत कहिन के पत्रकार मन ह देश अऊ समाज बर बहुत अकन उल्लेखनीय काम करे हें। अपन विचार अऊ अपन लेखनी ले उमन समाज ल रचनात्मक दिशा देहे के काम करे हें। अइसन पत्रकार मन के नाम देश के इतिहास म स्वर्ण अक्षर म लिखे जाथे। उमन कहिन के बहुत अकन मनखे खबर बर अखबार अऊ इलेक्ट्रॉनिक मीडिया के सहारा लेथें, फेर हमर अभी हाल के पीढ़ी ह मोबाइल म सोशल मीडिया ल देखके अपन मानसिकता बनाथे। उमन कहिन के प्रिंट अऊ इलेक्ट्रॉनिक मीडिया बर बहुत अकन नियामक कानून हे, फेर सोशल मीडिया बर अइसन कोनो व्यवस्था नइ हे। सोशल मीडिया बर न कोनो प्रशिक्षण के जरूरत हे अऊ न कोनो मर्यादा के। सोशल मीडिया म मनखे मन ल ट्रोल करे के बढ़त चलन उपर चिन्ता व्यक्त करत मुख्यमंत्री ह कहिन के सोशल मीडिया म कुछ मनखे मन के नकारात्मक टिप्पणी मन मनखे मन ल हतोत्साहित करथे, एखर सेती बहुत अकन अच्छा विचारक अऊ संवेदनशील मनखे ट्वीटर अऊ फेसबुक जइसे सोशल मीडिया प्लेटफार्म ल छोड़त हें। उमन कहिन के सोशल मीडिया ले अभी हाल के पीढ़ी दिग्भ्रमित होवत हे, एखर से कइसे बचे जा सकत हे, ये म गंभीरता ले विचार करे के जरूरत हे। ऐतिहासिक तथ्य मन के संग छेड़खानी नइ होना चाही। कहूं कोनो इतिहास बनाथे, त ये बने बात हे, फेर इतिहास बदले के कोसिस दुर्भाग्य जनक हे।
वसुंधरा सम्मान निर्णायक समिति के अध्यक्ष अऊ वरिष्ठ पत्रकार श्री रमेश नैयर ह कहिन के स्वर्गीय श्री देवी प्रसाद चौबे ह ओ भारतीय परम्परा के निर्वाह करिन जेमां राजनीति अऊ पत्रकारिता एक संग चलत रहिस। वसुंधरा सम्मान ले सम्मानित श्री ई.वी. मुरली ह कहिन के महात्मा गांधी के नमक सत्याग्रह आंदोलन के जइसे व्यापक प्रभाव देश के स्वतंत्रता संग्राम म रहिस, वइसनहे मुख्यमंत्री श्री भूपेश बघेल के सियानी म चालू करे गए गोधन न्याय योजना के घलोक दूरगामी सकारात्मक प्रभाव परही। गोधन न्याय योजना ग्रामीण स्वावलम्बन के एक बड़का योजना सिद्ध होही।
