मुख्यमंत्री श्री बघेल ह पूर्व मुख्यमंत्री श्री अजीत जोगी के पार्थिव शरीर उपर पुष्पचक्र अर्पित करके श्रद्धांजलि दिस

*मुख्यमंत्री श्री बघेल ह पूर्व मुख्यमंत्री श्री अजीत जोगी के पार्थिव शरीर उपर पुष्पचक्र अर्पित करके श्रद्धांजलि दिस*

*शोकाकुल परिजन मन ले मिलके ढांढस बंधाइस*

*छत्तीसगढ़ के माटीपुत्र श्री अजीत जोगी के निधन अपूरणीय क्षति: मुख्यमंत्री श्री बघेल*

रायपुर, 29 मई 2020। मुख्यमंत्री श्री भूपेश बघेल ह आज देर शाम सागौन बंगला म पहुंच के पूर्व मुख्यमंत्री श्री अजीत जोगी के पार्थिव शरीर उपर पुष्पचक्र अर्पित करके श्रद्धांजलि दिस. ये अवसर म उमन श्री जोगी के धर्मपत्नी श्रीमती रेणु जोगी अउ पुत्र श्री अमित जोगी ले मिल के शोक संवेदना व्यक्त करिस अउ ओमन ल ढांढस बंधाइस.

मुख्यमंत्री श्री भूपेश बघेल ह कहिन कि पूर्व मुख्यमंत्री श्री अजीत जोगी के जीवन ल वो तीन हिस्सा म देखथे, जोन म वो मेघावी छात्र, दक्ष प्रशासनिक अधिकारी अउ अच्छा राजनेता के रूप म नजर आथे. श्री बघेल ह कहिन कि विपरीत परिस्थिति म घलो उमन संघर्ष के दामन ल नई छोड़िस. लगातार समस्या मन ले जूझने वाला बहुत ही जीवट अउ संघर्षशील व्यक्तित्व के धनी रहिस. छत्तीसगढ़ के माटीपुत्र श्री जोगी के निधन ले अपूरणीय क्षति होय हे. मैं उंखर आत्मा के शांति बर ईश्वर ले प्रार्थना करत हव. ये अवसर म छत्तीसगढ़ मंत्रिमण्डल के सदस्य अउ विधायकगण मन घलो श्री अजीत जोगी के पार्थिव शरीर उपर पुष्प चक्र अर्पित करके श्रद्धांजलि दिस. आप मन ल बता देथन कि छत्तीसगढ़ के पहली मुख्यमंत्री श्री अजीत जोगी के आज रायपुर के एक निजी अस्पताल म निधन होगे. छत्तीसगढ़ सरकार द्वारा उंखर निधन म तीन दिन के राजकीय शोक घोषित करे गये हे. श्री जोगी के अंतिम संस्कार कल 30 मई के पूरा राजकीय सम्मान के संग गौरेला म होही.