मुख्यमंत्री सहायता कोष ले जिला मन ल अब तक कुल 10.40 करोड़ रुपए होइस जारी
रायपुर, 10 मई 2020। मुख्यमंत्री श्री भूपेश बघेल ह राज्य म नोवेल कोरोना वायरस के संक्रमण के रोकथाम बर राज्य के 9 जिला मन ल एक करोड़ 20 लाख रूपिया के राशि मुख्यमंत्री सहायता कोष ले स्वीकृत करे हे।
मुख्यमंत्री सहायता कोष ले रायपुर जिला ल कोरोना संक्रमण के रोकथाम बर 20 लाख रूपिया राशि स्वीकृत करे गए हे। अइसनहे राजनांदगांव, दुर्ग, कबीरधाम अउ बिलासपुर जिला ल 15-15 लाख रूपिया अऊ बलरामपुर-रामानुजगंज, सूरजपुर, गौरेला-पेन्ड्रा-मरवाही अऊ मुंगेली जिला ल 10-10 लाख रूपिया के राशि स्वीकृत करे गए हे।
जानबा हे के मुख्यमंत्री श्री भूपेश बघेल ह प्रदेश म कोरोना वायरस के संक्रमण के रोकथाम बर एखर ले पहिली सबो 28 जिला मन ल 25-25 लाख रूपिया अऊ 11 जिला मन ल 20-20 लाख रूपिया जारी करे रहिन। एला मिला के जिला मन ल अब तक 10 करोड़ 40 लाख रूपिया जारी करे जा चुके हे।
