- कहू 14 अप्रेल के अंतर्राज्यीय आवागमन चालू करे जात हे त ओखर पहिली कोविड-19 के प्रसार रोके बर ठोस उपाय सुनिश्चित करे के करिन आग्रह
- उपाय मन के सम्बंध म होवय व्यापक विचार-विमर्श
- छत्तीसगढ़ म जनसहयोग ले स्थिति नियंत्रण म
रायपुर, 6 अप्रैल 2020। मुख्यमंत्री श्री भूपेश बघेल ह प्रधानमंत्री श्री नरेंद्र मोदी ल चिट्ठी लिखके देश म अंतर्राज्यीय आवागमन चालू करे के पहिली पूरा देश म कोविड-19 के प्रसार के स्थिति ल नियंत्रण म रखे बर ठोस उपाय सुनिश्चित करे के आग्रह करे हें। मुख्यमंत्री ह अपन चिट्ठी म कहे हें के अंतर्राज्यीय आवागमन सुरू करे के पहिली ये संबंध म व्यापक विचार विमर्श करके ठोस उपाय लागू करना चाही।
मुख्यमंत्री ह प्रधानमंत्री श्री मोदी ल चिट्ठी म लिखे हें के देश अभी हाल म कोविड-19 के वायरस प्रभावित आपदा ले जूझत हे। छत्तीसगढ़ देश के सबले पहिली राज्य मन म ले एक हे, जिहां 18 मार्च के कोविड-19 के पहिली मरीज मिले के बाद 21 मार्च के लॉक डाउन के घोषणा कर देहे गए रहिस। मुख्यमंत्री ह चिट्ठी म लिखे हें के आप मन के निर्णय के मुताबिक राज्य म 14 अप्रेल तक पूरा लॉक डाउन के स्थिति लागू रइही।
श्री बघेल ह छत्तीसगढ़ म कोरोना वायरस के नियंत्रण के उपाय मन के संबंध म चिट्ठी म लिखे हें के छत्तीसगढ़ राज्य म 4 अप्रेल 2020 तक कुल 1590 मनखे के सैंपल लेहे गए रहिस, तेमा ले 1375 मनखे के परिणाम नेगेटिव रहे हे, 205 के जांच जारी हे अऊ 10 मनखे कोविड-19 वायरस ले पीड़ित पाए गे रहिन। ए 10 मनखे मन ले अब तक आठ मनखे ठीक होके अपन घर चल देहें हें अऊ बांचे 2 मरीज के हालत सामान्य बने हे। राज्य म अभी तक कोविड-19 वायरस ले कोनो के मृत्यु नइ होए हे अऊ ना ही कोनो गंभीर रूप ले संक्रमित हे।
श्री बघेल ह चिट्ठी म बताए हें के राज्य शासन के तरफ ले करे गए उपाय अउर अनुशासित जन के सहयोग ले अभी तक स्थिति नियंत्रण म हे फेर देश के आन भाग मन म कोविड-19 वायरस पीड़ित मन के संख्या म सरलग बढ़ोतरी होवत हे। जइसे-जइसे कोविड-19 वायरस पीड़ित मन के संख्या म सरलग बढ़ोतरी होवत हे, वइसे वइसे कोविड-19 वायरस टेस्ट के संख्या बाढ़ही, संक्रमित मन के संख्या म सरलग बढ़ोतरी होए के पूरा संभावना हे। देश म कहूं 14 अप्रेल के बाद ट्रेन, वायु यातायात अउ अंतर्राज्यीय सड़क परिवहन चालू करे जात हे, त ये संभावना हे के छत्तीसगढ़ राज्य म आन राज्य ले संक्रमित मनखे आ सकत हें, जेमां छत्तीसगढ़ राज्य ल नवा परेशानी के सामना करना पड़ सकत हे। अइसन स्थिति म आन राज्य मन म घलोक उत्पन्न होए के पूरा संभावना हे।
मुख्यमंत्री श्री बघेल ह प्रधानमंत्री ले अनुरोध करे हें के अंतर्राज्यीय आवागमन ल चालू करे के निर्णय लेहे के पहिली परखर विचार विमर्श करके अइसन ठोस उपाय करे जाए जेखर से पूरा देश म कोविड-19 प्रसार के स्थिति नियंत्रण म रखे जा सकय।
