- रायपुर के अम्बेडकर अस्पताल के माइक्रोबायलॉजी विभाग ल नोवेल कोरोना वायरस टेस्टिंग बर अधिकृत करे के आग्रह
- छत्तीसगढ़ म कोरोना वायरस टेस्टिंग के सिरिफ दू केन्द्र – टेस्टिंग केन्द्र बढ़ाए के करिस अनुरोध
रायपुर, 02 अप्रेल 2020। मुख्यमंत्री श्री भूपेश बघेल ह आज केन्द्रीय स्वास्थ्य अउ परिवार कल्याण मंत्री डॉ. हर्षवर्धन ल चिट्ठी लिखके छत्तीसगढ़ म नोवेल कोरोना वायरस टेस्टिंग के केन्द्र मन के संख्या म बढ़ोतरी करे के आग्रह करे हें। श्री बघेल ह चिट्ठी म लिखे हें के राजधानी रायपुर के डॉ. भीमराव अम्बेडकर स्मृति चिकित्सालय रायपुर के माइक्रोबायलॉजी विभाग ल नोवेल कोरोना वायरस टेस्टिंग बर अधिकृत करे जाना चाही। इहां कोरोना वायरस के जांच बर सबो सुविधा उपलब्ध हे।
मुख्यमंत्री ह चिट्ठी म लिखे हें के भारत सरकार कोति ले नोवेल कोरोना वायरस के संक्रमण ल राष्ट्रीय आपदा घोषित करे गए हे अऊ छत्तीसगढ़ सरकार कोति ले एला पूरा छत्तीसगढ़ म संक्रामक रोग घोषित करे गए हे। राज्य म कोरोना वायरस (कोविड-19) के महामारी ले बचाव बर समुदाय स्तर म सक्रिय निगरानी करके मरीज के जल्दी पहिचान अउ उपचार करे जात हे।
उमन लिखे हें के छत्तीसगढ़ राज्य म अभी हाल म कोरोना वायरस के जांच सिरिफ दू जगा म अखिल भारतीय आयुर्विज्ञान संस्थान, रायपुर अउ स्व. श्री बलीराम कश्यप स्मृति शासकीय चिकित्सा महाविद्यालय जगदलपुर म ही करे के सुविधा हे। अभी हाल के विषम हालत ल देखत राज्य म अऊ जादा कोरोना वायरस जांच केन्द्र अधिकृत करे के जरूरत हे जेखर से संदिग्ध मनखे के तुरंते जांच करके रिपोट मुताबिक कार्यवाही करे जा सकय। इही कड़ी म रायपुर स्थित डॉ. भीमराव अम्बेडकर स्मृति चिकित्सालय रायपुर के माइक्रोबायलाजी विभाग म कोरोना वायरस के जांच बर सबो जरूरी सुविधा उपलब्ध हे। ओ सुविधा मन ल देखत सचिव, स्वास्थ्य विभाग कोति ले 24 मार्च के डायरेक्टर जनरल आईसीएमआर न्यू दिल्ली ल टेस्टिंग बर अधिकृत करे के अनुरोध करे गए हे, फेर अभी तक जवाब नइ आए हे।
मुख्यमंत्री ह लिखे हे के अभी हाल परिस्थिति अउ डॉ. भीमराव अम्बेडकर स्मृति चिकित्सालय रायपुर म उपलब्ध सुविधा मन ल देखत अनुरोध हे के डॉ. भीमराव अम्बेडकर स्मृति चिकित्सालय रायपुर के माइक्रोबायलॉजी विभाग ल नोवेल कोरोना वायरस के टेस्टिंग बर अधिकृत करे के कष्ट करव।
