- मनरेगा के मजदूरी खाद्यान्न के रूप म भुगतान करे के अनुमति देहे के करिन अनुरोध
- राज्य म 31.50 लाख सक्रिय परिवार के 62.52 लाख मनखे के आजीविका मनरेगा उपर निर्भर
- खाद्यान्न सुरक्षा के संग लॉकडाउन म श्रमिक मन ल मिलही कई समस्या मन ले राहत
रायपुर, 24 अप्रैल 2020। मुख्यमंत्री श्री भूपेश बघेल ह केन्द्रीय ग्रामीण विकास, कृषि अऊ किसान कल्याण अऊ पंचायती राज मंत्री श्री नरेन्द्र सिंह तोमर ल चिट्ठी लिखके महात्मा गांधी राष्ट्रीय ग्रामीण रोजगार गारंटी योजना के तहत कार्यरत श्रमिक मन ल मजदूरी भुगतान के रूप म खाद्यान्न प्रदान करे के स्वीकृति देहे के अनुरोध करे हें।
मुख्यमंत्री श्री बघेल ह अपन चिट्ठी म लिखे हें के महात्मा गांधी राष्ट्रीय ग्रामीण रोजगार गारंटी (मनरेगा) योजनांतर्गत मजदूरी राशि के भुगतान नेशनल इलेक्ट्रानिक फण्ड मैनेजमेंट सिसटम (एनईएफएमएस) के माध्यम ले सीधा श्रमिक मन के खाता म क्रेडिट होथे। कोरोना वायरस संक्रमण ल दृष्टिगत रखत पूरा राज्य लॉकडाउन हे। राज्य म 31 लाख 50 हजार सक्रिय परिवार के 62 लाख 52 हजार मनखे के आजीविका मनरेगा उपर ही निर्भर हे। अइसन स्थिति म प्रभावी लॉकडाउन अऊ संक्रमण ले बचाव के जम्मो साधन मन के प्रयोग करत योजना के क्रियान्वयन अनिवार्य हे।
मुख्यमंत्री ह कहे हें के राज्य शासन कोति ले कोरोना वायरस ले बचाव के उपाय के संग मनरेगा योजनांतर्गत काम सम्पादित कराये जात हे अऊ अभी हाल म करीबन 5 लाख श्रमिक प्रति दिन नियोजित होवत हे। मजदूरी के राशि क्रेडिट होए के बाद ओ मन ल अपन भोजन (खाद्यान्न) जइसे प्राथमिक जरूरत मन के पूर्ति बर पहिली खाता ले पैसा निकाले के जरूरत होही, जेखर से ओ मन ल परेशान तो होहीच संगे सोशल डिस्टैसिंग के पालन म घलोक कठिनाई होही। आप मन जानतेच हव के छत्तीसगढ़ म बैंक शाखा मन के कमी हे, संगे नक्सल प्रभावित अऊ आकांक्षी जिला मन म इंटरनेट कनेक्टिविटी के घलोक समस्या हे। येकर सेती जब देखबे तब लिंक फेल होवत रहिथे, जेखर सेती राशि आहरण बर मजदूर मन ल कई पइत बैंक म सम्पर्क करना परत हे।
मुख्यमंत्री श्री बघेल ह चिट्ठी म लिखे हें के राज्य शासन तीर भरपूर मात्रा म खाद्यान्न उपलब्ध हे अऊ एखर वितरण के प्रभावी व्यवस्था लागू हे। उमन महात्मा गांधी राष्ट्रीय ग्रामीण रोजगार गारंटी योजनांतर्गत कार्यरत श्रमिक मन के मजदूरी के राशि राज्य शासन ल उपलब्ध करात एखर बल्दा ओ मन ल खाद्यान्न वितरित करे के अनुमति प्रदान करे के अनुरोध करे हें, ताकि अभी हाल म उपजे उलट परिस्थिति मन म घलोक गांव वाले मन बर खाद्यान्न सुरक्षा सुनिश्चित करे जा सकय।
