- रोका छेका के पूजा चलत रहिस तभे आ गीस मुख्यमंत्री के फोन, गांव वाले मन म खुशी के लहर
- पाटन ब्लॉक के ग्राम पतोरा म वीडियो कॉल के माध्यम ले मुख्यमंत्री श्री भूपेश बघेल ह करिन चर्चा
- ग्राम पंचायत के सरपंच ले लीन तैयारी मन के जानकारी
दुर्ग, 19 जून 2020। मुख्यमंत्री श्री भूपेश बघेल के कहे म आज ले पूरा प्रदेश म खरीफ फसल ल मवेसी मन ले बचाय बर रोका-छेका के तैयारी गांवों-गांव म चालू हो गीस। जेमा पंचायत प्रतिनिधि मन संग गांव वाले मन बड़ उछाह के संग भाग लेवत हें।
मुख्यमंत्री श्री भूपेश बघेल ह आज अपन निवास कार्यालय ले दुर्ग जिला के ग्राम पतोरा म आयोजित रोका-छेका के रस्म के बेरा म वीडियो कॉन्फ्रेंसिंग के माध्यम ले सामिल होइन। ग्राम पतोरा म घलोक ये रस्म के आयोजन करे गए रहिस। गांव वाले मन बर ये बेरा अऊ बड़का खुशी म बदल गीस काबर के पूजा के तुरंते बाद मुख्यमंत्री श्री भूपेश बघेल ह वीडियो कॉल के माध्यम ले इहां के गांव वाले मन ले बातचीत करिन। मुख्यमंत्री ह सरपंच ले पूछिन के गाय मन के पूजा हो गीस। आप मन सबो ह का किरिया खाए हव। आप मन के उत्साह ल देखके बहुत खुशी महसूस होवत हे। गौठान ल आगू बढ़ाए बर गठित समिति के सदस्य सबो ग्रामीण जन उत्साह ले जुटे दिखत हें। रोका-छेका के रस्म ल मनाए बर तूमन अतीक मेहनत ले काम करत हव। ये बहुत खुशी के बात हे। रोका-छेका हमर ग्रामीण संस्कृति के महत्वपूर्ण परंपरा हे। ये परंपरा ल निभाए बर तूंहर कोति ले जऊन जतन करे गए हे। वो तुहर अतीक उत्साह ले जुड़े हे, ये देखके अड़बड़ सुग्घर लागत हे।
