सूरजपुर, 27 अप्रैल 2020। कोरोना वायरय (कोविड-19) महामारी के रोकथाम बर लॉकडाउन के समय घलोक मुख्यमंत्री राहत शिविर आजीविका के केन्द्र बन गए हे। राहत शिविर म रूके श्रमिक मन बर शासन कोति ले रोजगार उपलब्ध कराए जात हे। स्वस्थ्य श्रमिक, फिजिकल डिस्टेंसिंग के पालन करत खाली समय म मेहनत करके अकतहा आमदनी घलोक अर्जित करत हें।
जानबा हे के सूरजपुर जिला म जिला प्रशासन कोति ले दीगर राज्य अउ आन जिला के फंसे करीबन 631 श्रमिक मन ल 31 राहत केंद्र म पहुना जइसे ठहराए गए हे। इहां पहुना के रूप म उंखर देखभाल करे बर नोडल अधिकारी घलोक नियुक्त करे गए हे। राहत शिविर म रूके सबो श्रमिक मन ल राज्य शासन के जारी हुकुम के मुताबिक भोजन, रहे बर पूरा व्यवस्था करे केसंगें-संग खेल सामान जइसे लूडो, कैरम, टीवी आदि प्रदान करे गए हे। श्रमिक मन ल नियमित रूप ले योग घलोक कराए जात हे। लइका मन के पढ़ाई बर व्यवस्था घलोक सुचारु रुप ले चलत हे।
ए शिविर मन म रुके श्रमिक मन ल उंखर दैनिक मजदूरी के जऊन आर्थिक क्षति होवत हे ओखर पूर्ति बर जिला प्रशासन ह विशेष पहल करत ए मन ल दैनिक आजीविका के काम उपलब्ध करावत हे। शिविर म श्रमिक मन बांस के ट्री गार्ड के निर्माण करत हें। जेला वन विभाग जल्दी क्रय करही। एखर बर श्रमिक मन ल जरूरी बांस के उपलब्धता वन विभाग कोति ले कराए के संगेच काम चालू होए ले पहिली मास्टर ट्रेनर कोति ले प्रशिक्षण घलोक देहे गए हे। जेखर बाद इमन सुरक्षा मानक के पालन करत ट्री गार्ड बनाए म शिद्दत के संग जुट गे हें।
प्रशिक्षित श्रमिक मन अतका ट्री गार्ड मात्र दू दिन म ही बना डरे हें के प्रशासन ह करीबन 30 हजार रूपिया ले जादा के भुगतान इमन ल करे हे। ए प्रकार ले हरेक श्रमिक दिन म करीबन 350 ले 400 रूपिया तक के आमदनी अर्जित करत हें। ये विशेष पहल ले मुख्यमंत्री राहत शिविर न केवल राहत शिविर वरन् एक मुख्यमंत्री आजीविका केंद्र के रूप म तब्दील हो गए हे। इहां रूके पहुना मन म बहुत खुशी के माहौल हे अऊ अब ओ मन ल अपन ऊर्जा के सदुपयोग करत अऊ बेहतर तरीका ले समय बिताए के अवसर मिलत हे। इही मन म शामील मध्य प्रदेश बालाघाट जिला के एक अतिथि श्री भोजलाल डोमार ल जब वोखर मेहनत के कमई हाथ म मिलीस त वो ह छत्तीसगढ़ सरकार ल धन्यवाद करत कहिस के लाकडाउन म जब हम शिविर म आए रहेन, त ये नइ सोंचे रहेन के राहत शिविर म हमला काम घलो मिल जाही अऊ एखर से आमदनी घलोक मिलही।
श्री भोजलाल डोमार ह बताइस के छत्तीसगढ़ सरकार हमर अऊ हमार परिवार के न केवल सुरक्षा के ध्यान रखत हे भलुक हमार आजीविका बर काम के अवसर उपलब्घ कराए हे। अब हम इहां मुख्यमंत्री राहत शिविर के सुग्घर सुरता के संग कमाए पइसा ल लेके अपन घर जाबोन।
