रायपुर, 18 मई 2020। मुख्यमंत्री श्री भूपेश बघेल ह लॉकडाउन के समय आंगनबाड़ी कार्यकर्ता मन ल घर-घर जाके रेडी टू ईट के सामान अऊ सूखा राशन वितरित करे अऊ कोरोना संक्रमण ले बचाव के उपाय के जानकारी देके मनखे मन ल जागरूक करे के काम ल सहराइन। उमन कहिन के प्रदेश म कोरोना संक्रमण के नवा मरीज मिलत हें, आंगनबाड़ी कार्यकर्ता मन ल फेर घर-घर भेजके मनखे मन के स्वास्थ्य के जानकारी लेहे जाय अऊ संदिग्ध मरीज मिले म स्वास्थ्य विभाग के माध्यम ले अइसन मरीज मन के स्वास्थ्य के जांच कराए जाय।
मुख्यमंत्री श्री बघेल ह आज इहां अपन निवास कार्यालय म आयोजित महिला अऊ बाल विकास विभाग अऊ समाज कल्याण विभाग के समीक्षा बैठक म ये हुकुम दीन। बैठक म महिला अउ बाल विकास मंत्री श्रीमती अनिला भेंडिया, मुख्य सचिव श्री आर.पी. मण्डल, मुख्यमंत्री के अपर मुख्य सचिव श्री सुब्रत साहू, महिला अउ बाल विकास विभाग के सचिव श्री सिद्धार्थ कोमल सिंह परदेशी, समाज कल्याण विभाग के सचिव श्री आर. प्रसन्ना, संचालक महिला अउ बाल विकास विभाग श्री जनमेजय महोबे अऊ संचालक समाज कल्याण श्री पी. दयानंद उपस्थित रहिन।