रायपुर, 18 सितंबर 2020। मुख्यमंत्री श्री भूपेश बघेल ह आज अपन निवास कार्यालय म बैरिस्टर ठाकुर छेदीलाल के पुण्यतिथि म श्रद्धासुमन अर्पित करके ओ मन ल विनम्र श्रद्धांजलि दीन। ये बेरा म श्री बघेल ह कहिन के बैरिस्टर ठाकुर छेदीलाल बहुमुखी प्रतिभा के धनी रहिन। ओ मन सिद्धहस्त लेखक, पत्रकार, संगीतज्ञ, कर्मठ नेता अऊ स्वाधीनता संग्राम के सच्चा सेनानी रहिन।
श्री बघेल ह बैरिस्टर ठाकुर छेदीलाल के योगदान ल सुरता करत कहिन के छत्तीसगढ़ म स्वाधीनता आंदोलन के समय बैरिस्टर ठाकुर छेदीलाल ह ’सेवा समिति’ के माध्यम ले युवक मन ल संगठित करिन। युवा मन म राष्ट्रीयता के भावना जागृत करके स्वतंत्रता आंदोलन ले जोड़े म बैरिस्टर ठाकुर छेदीलाल के महत्वपूर्ण योगदान रहे हे। उमन कानून के उच्च शिक्षा प्राप्त करिन फेर महात्मा गांधी के आह्वान म वकालत छोड़के असहयोग आंदोलन ल मजबूत करे म लग गें। बैरिस्टर ठाकुर छेदीलाल ह सविनय अवज्ञा आंदोलन म महत्वपूर्ण भूमिका निभाईन अऊ संविधान सभा के सदस्य घलोक रहिन।
