जापान अऊ दक्षिण कोरिया के सफल विदेश दौरा ले वापस लहुटिन मुख्यमंत्री श्री साय

एयरपोर्ट म होइस भव्य स्वागत, कर्मा-पंथी नाच ले सराबोर रहिस एयरपोर्ट परिसर
रायपुर, आठ दिन के जापान अऊ दक्षिण कोरिया के विदेश दौरा के बाद आज मुख्यमंत्री श्री विष्णु देव साय वापस रायपुर लहुटे हें। श्री साय के वापस लहुटे म आज एयरपोर्ट म उंखर भव्य स्वागत करे गीस। छत्तीसगढ़ के पारंपरिक कर्मा अऊ पंथी नाच ले पूरा एयरपोर्ट परिसर लगभग एक घंटा तक सराबोर रहिस। मनखे मन के बड़ संख्या म मौजूदगी ह मुख्यमंत्री श्री साय के लोकप्रियता अऊ ऊंखर विदेश दौरा के सफलता ल खुदे बतात रहिस हे। मुख्यमंत्री के फुल के गुच्छा ले लेके गजमाला तक ले स्वागत करे गीस। एयरपोर्ट के निकास दुवारी ले मीडिया गैलेरी तक लगभग 100 मीटर के दूरी तय करे म श्री साय ल लगभग 15 मिनट लग गए। ए बेरा म मनखे मन ह फुल के बरसा ले घलोक श्री साय के स्वागत करिन। बाद म मुख्यमंत्री ह उपस्थित जनसमुदाय ल सम्बोधित करिन अऊ ए भव्य स्वागत बर सबो के आभार जताइन। मुख्यमंत्री ह कहिन के जापान अऊ दक्षिण कोरिया दुनों देश म बड़का भारतीय समुदाय बसे हे अऊ हमार छत्तीसगढ़ के मनखे घलोक उहां व्यापारिक काम मन म लगे हें। उंखर से मिलके मोला बहुत अच्छा लागिस अऊ ये लगबेच नइ करिस के हम परदेश म हन। उमन कहिन के हमार उद्यमी, हमार कारोबारी पूरा दुनिया म फइले हें अऊ भारत भुइंया के नाव हर कोति रोशन करत हें।