मुख्यमंत्री श्री विष्णु देव साय ह बीजापुर म सुशासन तिहार के तीसर चरण के समीक्षा करत दीन हुकुम

शिक्षा, पेयजल, रोजगार अऊ आत्मसमर्पित नक्सली मन के पुनर्वास ल मिलय सर्वोच्च प्राथमिकता

रायपुर, 16 मई 2025/ मुख्यमंत्री श्री विष्णु देव साय ह बीजापुर जिला मुख्यालय म आयोजित उच्चस्तरीय समीक्षा बैठक म प्रशासनिक अधिकारी मन ल निर्देशित करिन के ओ मन जनकल्याणकारी योजना मन के प्रभावी क्रियान्वयन बर सरलग निगरानी अउ समन्वय बनाए रखंय। बैठक म मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध सिंह, पुलिस महानिदेशक श्री अरुण देव गौतम संग आन वरिष्ठ अधिकारीगण उपस्थित रहिन।
मुख्यमंत्री श्री विष्णु देव साय ह बीजापुर जिला म भू-जल स्तर अऊ पेयजल के स्रोत मन के उपलब्धता के समीक्षा करिन। कलेक्टर बीजापुर ह बताइस के मांग के मुताबिक नलकूप मन के खोदई करवाए गए हे। मुख्यमंत्री श्री साय ह पेयजल के दीर्घकालिक आपूर्ति बर वैकल्पिक स्रोत मन उपर घलोक काम करे के निर्देश दीन।
मुख्यमंत्री श्री साय ह शिक्षा के गुणवत्ता ल लेके अधिकारी मन ले विस्तृत जानकारी लीन। बैठक म बताए गीस के समर कैंप अऊ ‘बाल शिक्षा मित्र’ जइसे नवाचार मन ले लइका मन के शिक्षा म रुचि बाढ़े हे। मुख्यमंत्री श्री साय ह ए उदीम मन ल अऊ जादा संगठित अउ परिणामोन्मुखी बनाए उपर बल दीन।
मुख्यमंत्री श्री साय ह ग्रामीण क्षेत्र मन ल मुख्य मार्ग मन ले जोड़े बर मुख्यमंत्री ग्रामीण बस सेवा योजना के संबंध म चर्चा करत कहिन के बस्तर अऊ सरगुजा संभाग ल प्राथमिकता दे जाही। उमन ए सम्बन्ध म बीजापुर अऊ दंतेवाड़ा के कलेक्टर मन ल रूट चिन्हांकन कर के प्रस्ताव भेजे के निर्देश दीन।
मुख्यमंत्री श्री साय ह कहिन कि आत्मसमर्पण करइया नक्सली मन बर घर, पुनर्वास अऊ कौशल प्रशिक्षण के समुचित व्यवस्था करे जाय। उमन एनएमडीसी अउ निजी क्षेत्र मन म रोजगार के संभावना मन बर प्लेसमेंट कैंप आयोजित करे के निर्देश दीन।
मुख्यमंत्री श्री साय ह सुशासन तिहार के तीसर चरण म खुदे भागीदारी करत जमीनी सच्चाई के मूल्यांकन करे के बात कहिन। उमन कहिन के बीते डेढ़ बछर म प्रधानमंत्री श्री नरेंद्र मोदी के गारंटी के अधिकांश वादा पूरा करे हे अऊ बस्तर क्षेत्र म नक्सलवाद के विरुद्ध निर्णायक लड़ाई लड़े जात हे।
मुख्यमंत्री श्री साय ह जनजातीय समुदाय के आर्थिक समृद्धि बर ओ मन ल उंखर प्रकृति के मुताबिक काम मन ले जोड़े के बात कहिन। उमन कहिन के अटल सेवा केंद्र के शुभारंभ बहुत अकन पंचायत मन म हो गए हे, जेखर से अब गांव वाले मन ल बैंकिंग सेवा ऊंखरेच गांव मन म सुलभ होही।
बैठक के आखरी म मुख्यमंत्री ह कहिन के टीम भावना ले काम करे ले ही प्रशासनिक अऊ विकासात्मक लक्ष्य ल हासिल करे जा सकत हे। उमन सबो अधिकारी मन ले अपील करिन के ओ मन इही भावना ले काम करत जनता के कल्याण बर प्रतिबद्ध रहंय। बैठक म वन मंत्री श्री केदार कश्यप संग आन जनप्रतिनिधिगण अउ अधिकारीगण उपस्थित रहिन।