क्लस्टर के 08 ग्राम पंचायत के मनखे मन ले करिन सीधा गोठ-बात
मुख्यमंत्री ह क्षेत्र ल दीन विकास के सौगात, कई महत्वपूर्ण घोषणा करिन
मानपुर विकासखंड के ग्राम सीतागांव म समाधान शिविर के सफल आयोजन
97% आवेदन मन के होइस निराकरण
समाधान शिविर सीतागाँव म पात्र हितग्राही मन ल बांटिन समान
रायपुर 16 मई 2025/मुख्यमंत्री श्री विष्णु देव साय आज मोहला-मानपुर-अंबागढ़ चौकी जिला के मानपुर विकासखंड अंतर्गत ग्राम सीतागांव के सेक्टर सीतागांव म आयोजित समाधान शिविर म सामिल होइन। ए बेरा म ऊंखर संग उप मुख्यमंत्री अउर जिला के प्रभारी मंत्री श्री विजय शर्मा, मुख्यमंत्री प्रमुख सचिव श्री सुबोध सिंह घलोक उपस्थित रहिन।
सुशासन तिहार के तीसर चरण म आज समाधान शिविर म क्षेत्र के 08 ग्राम पंचायत मन सीतागांव, मदनवाडा, कारेकट्टा, हलांजुर, हुरेली, कंदाडी, कोहका, हलोरा ग्राम पंचायत ल क्लस्टर के रूप म सामिल करे गए रहिस। मुख्यमंत्री ह क्लस्टर के 08 ग्राम पंचायत मन के हितग्राही मन ले सीधा गोठबात करके शासन के योजना मन के जानकारी लीन अऊ उंखर समस्या सुनिन।
मुख्यमंत्री श्री साय ह अपन संबोधन म कहिन के अभी पूरा प्रदेश म सुशासन तिहार 2025 मनाया जात हे। हमर सरकार ल कार्यभार संभाले 1.5 साल होय हे, ए समे म हमन सरलग जनता के बीच पहुंचके योजना मन के प्रभाव अऊ लाभ के आकलन करे हन। ए सुशासन तिहार म अब तक 40 लाख ले जादा आवेदन आए हे, जेकर निराकरण अधिकारी मन ह दूसर चरण म 20 दिन तक करे हें। अभी हाल म समाधान शिविर मन के तीसर चरण के आयोजन करे जात हे।
मुख्यमंत्री ह बताइस के हमर सरकार बिना पहिली ले बताए कोनो जगा पहुंचके चौपाल लगाके जनता ले सीधा गोठबात करके उंखर समस्या सुनत हे। ये सरकार पारदर्शिता अऊ जनभागीदारी के भावना ले काम करत हे।
मुख्यमंत्री ह ये घलोक बताइन के राज्य म सरकार बने के बाद 18 लाख प्रधानमंत्री आवास पास करे गए हे, जेमा ले नक्सल प्रभावित क्षेत्र मन बर 15 हजार विशेष मकान के स्वीकृति देहे गए हे। महतारी वंदन योजना के लाभ सबो पात्र बहिनी मन ल देहे जात हे, अऊ जिंकर नाम नइ जुड़े हे ओ मन के नाम जल्दी जोड़े जाही। उमन कहिन कि सरकार ह 3100 रुपिया प्रति क्विंटल के दर ले धान खरीदी करे हे। जमीन रजिस्ट्री के संग अब नामांतरण के प्रक्रिया घलोक अपन आप पूरा हो जाही। हक त्याग अब सिरिफ 500 रुपए म हो जात हे। प्रदेश के 1460 ग्राम पंचायत मन म अटल डिजिटल सेवा केंद्र स्थापित करे गए हे, जेन ल अवइया एक साल म सबो ग्राम पंचायत तक विस्तारित करे जाही।
मुख्यमंत्री ह बताइस के नवा रायपुर म स्थापित आदिवासी संग्रहालय जनजातीय संस्कृति के संरक्षण के दिशा म एक महत्वपूर्ण कदम हे। राज्य सरकार नक्सलवाद ल खतम करे बर सरलग उदीम करत हे अऊ मार्च 2026 तक एला पूरा खतम करे के लक्ष्य निरधारित करे गए हे।
ए बेरा म मुख्यमंत्री श्री विष्णु देव साय के प्रमुख घोषणा –
1. सीतागांव उप स्वास्थ्य केंद्र ल प्राथमिक स्वास्थ्य केंद्र के रूप म उन्नत करे जाही।
2. मोहला म बस स्टैंड अऊ छात्रावास के निर्माण करे जाही।
3. सीतागांव हाई स्कूल के हायर सेकेंडरी स्कूल म उन्नयन करे जाही।
4. अंबागढ़ चौकी क्षेत्र म 132 केवी सब स्टेशन के स्थापना को जाही।
एखरे संग सुशासन तिहार अंतर्गत आयोजित समाधान शिविर म मुख्यमंत्री के संग पात्र हितग्राही मन ल सामान वितरण करके लाभान्वित करे गीस। जेमां मत्स्य विभाग कोति ले हितग्राही मन ल जाल के वितरण करे गीस। खाद्य विभाग कोति ले हितग्राही मन ल राशन कार्ड के वितरण करे गीस। प्रधानमंत्री आवास अंतर्गत हितग्राही मन ल खुशि के चाबी देहे गीस। स्वच्छ भारत मिशन अंतर्गत हितग्राही लाभान्वित होइन संगेच स्वच्छता दीदी मन ल घलोक सम्मानित करे गीस। पेंशन योजना के हितग्राही घलोक लाभान्वित होइन। मुख्यमंत्री कोति ले क्षेत्र के मेधावी छात्र छात्रा मन ल घलोक पुरस्कृत करे गीस।
उप मुख्यमंत्री श्री विजय शर्मा ह समाधान शिविर म मनखे मन ले गोठबात करत कहिन कि सरकार मनखे मन के समस्या मन के निराकरण अऊ उंखर मांग ल पूरा करे बर गंभीरता ले काम करत हे। एखर बर बकायदा एक महीना पहिली ले आवेदन लेके ओखर परीक्षण करके मनखे मन के समस्या ल दूर करे जात हे। मुख्यमंत्री श्री विष्णु देव साय खुद समाधान शिविर म पहुंचके मैदानी स्तर म मनखे मन के समस्या मन के निराकरण के पड़ताल करत हे।
श्री शर्मा ह कहिन कि मनखे मन के सहुलियत बर जमीन के रजिस्ट्री, नामांतरण अऊ हक त्याग के प्रक्रिया म क्रांतिकारी बदलाव लाए गए हे। अब मनखे मन ल कागज-पत्तर लेके जगा-जगा घूमे के जरूरत नइ हे। रजिस्ट्री होतेच स्वमेव नामांतरण हो जाही। महतारी वंदन योजना अऊ प्रधानमंत्री आवास योजना के माध्यम ले सरकार ह महिला अऊ गरीब मन के बड़ चिंता करे हे। केंद्र सरकार अऊ राज्य सरकार के प्रयास ले राज्य म उत्तर ले लेके दक्षिण तक नक्सलवाद ल खतम करे म सरलग बड़का कामयाबी मिलत हे।
