ट्रकचालक मन के देशव्यापी हड़ताल ल देखत आम जनता ल दिक्कत झन होवय, ये ठउका करव जम्मो कलेक्टर-एसपी- मुख्यमंत्री श्री विष्णु देव साय ह दीन हुकुम
रायपुर, 2 जनवरी, 2024। ट्रकचालक मन के देशव्यापी हड़ताल ल देखत आम जनता ल जरूरी जिनिस मन के कोनो किल्लत झन होवय, ये ठउका करे बर मुख्यमंत्री श्री विष्णु देव साय ह वरिष्ठ अधिकारी मन अउ सबो जिला मन के कलेक्टर-एसपी ल हुकुम देहे हें। उमन ट्रकचालक मन के हड़ताल के चलते प्रदेश म आम जनता ल जरूरी सामान के उपलब्धता के संबंध म जमीनी स्थिति के समीक्षा वीडियो कांफ्रेंसिंग के माध्यम ले लीन। मुख्यमंत्री ह कहिन कि जनता ल जरूरी समान मन के दिक्कत कहूं होही अऊ येकर सेती कानून व्यवस्था के स्थिति बिगड़ीस त कलेक्टर-एसपी के जिम्मेदारी तय करे जाही। मंत्रालय महानदी भवन ले होए ये वीसी म संभागायुक्त, पुलिस महानिरीक्षक मन के संग जिला मन के कलेक्टर अऊ एसपी सामिल होइन।
मुख्यमंत्री ह कहिन कि आम मनखे तक एखर सही जानकारी पहुंचय अऊ भ्रामक खबर झन फइलय। अफवाह फैलइया मन उपर कार्यवाही करे जाय। अधिकारी पेट्रोल, डीजल, दवइ, फल, सब्जी, अनाज के उपलब्धता के जानकारी लेवव अऊ एखर सरलग आपूर्ति सुनिश्चित करव। पुलिस सरलग पेट्रोलिंग करव अऊ स्थिति उपर नजर बनाए रखव। प्रदेश अउ जिला स्तर म कंट्रोल रूम बनाय जाय जेन 24 घंटा संचालित होवय। कोनो जरूरी चीज के आपूर्ति बाधित होए म तुरंते कार्यवाही करे जाय। मुख्यमंत्री श्री साय ह कहिन कि सबो स्टाकहोल्डर मन ले बात करव अऊ देखव कि कहूं जमाखोरी तो नइ होवत हे।
मुख्यमंत्री श्री साय ह परिवहनकर्ता मन कोति ले करे जात आकस्मिक हड़ताल के मद्देनजर राज्य म पेट्रोल-डीजल अउ एलपीजी संग आन जरूरी वस्तु मन के परिवहन सतत जारी रखे अउर आपूर्ति सुनिश्चित करे के निर्देश दीन।
संगेेच ये घलोक कहिन कि राज्य म संचालित पेट्रोलियम-डीजल डिपो अऊ एलपीजी डिपो म वाहन के प्रवेश अऊ निकासी म राजस्व, पुलिस अउर खाद्य विभाग के अमला के ड्यूटी लगाए जाय ताकि कोनो प्रकार के व्यवधान ना करे जा सकय। उमन निर्देशित करिन कि प्रदेश के कोनो जिला म पेट्रोलियम-डीजल अऊ एलपीजी सेवा वाहन मन के परिवहन बाधित झन होवय। उमन सबो टोल नाका-चौकी म जरूरी व्यवस्था करे के निर्देश दीन। संगेच पेट्रोल-डीजल, घरेलू एलपीजी के सुचारू उपलब्धता अउ वितरण व्यवस्था बर ऑयल कंपनी के अधिकारी मन के संग जिला स्तरीय निगरानी दल गठित करे के निर्देश घलोक दीन।
ये मौका म मुख्य सचिव श्री अमिताभ जैन, पुलिस महानिदेशक श्री अशोक जुनेजा, अपर मुख्य सचिव श्री मनोज कुमार पिंगुआ, मुख्यमंत्री के सचिव श्री पी. दयानंद, खाद्य सचिव श्री टोपेश्वर वर्मा अऊ संचालक खाद्य श्री जितेंद्र शुक्ला संग आन अधिकारी मौजूद रहिन।
