मुख्यमंत्री श्री साय ले सॉफ्ट बाल खिलाड़ी साकेत अउ चंद्रहास ह करिन मुलाकात

रायपुर, 28 फरवरी 2024। मुख्यमंत्री श्री विष्णु देव साय ले आज विधानसभा परिसर म सॉफ्ट बाल खिलाड़ी साकेत बंजारे अऊ चंद्रहास यादव ह मुलाकात करिस। साकेत ह पटना- बिहार म आयोजित जूनियर सॉफ्ट बाल प्रतियोगिता के बालक वर्ग म छत्तीसगढ़ के प्रतिनिधित्व करे रहिस। ए प्रतियोगिता म छत्तीसगढ़ के टीम उपविजेता रहिस। मुख्यमंत्री श्री साय ह साकेत अउ यादव के हौसला अफजाई करत बेहतर प्रदर्शन बर उंखर सराहना करिन।
मुख्यमंत्री श्री विष्णु देव साय ह कहिन कि आप मन के टीम के अच्छा प्रदर्शन ह छत्तीसगढ़ के घलोक मान बढ़ाए हे। एखर से बाकी खिलाड़ी मन ल घलोक प्रेरणा मिलही। मुख्यमंत्री ह ओ मन ल आगू के स्पर्धा मन म अच्छा प्रदर्शन बर शुभकामना घलोक दीन।
41वां जूनियर नेशनल सॉफ्टबॉल चैंपियनशिप के आयोजन पटना-बिहार म 21 फरवरी ले 25 फरवरी तक होय रहिस। प्रतियोगिता म छत्तीसगढ़ के लड़का मन के टीम ह शानदार प्रदर्शन करीस अऊ फाइनल तक पहुंचे तक अजेय रहीस। छत्तीसगढ़ के टीम ह दिल्ली, गुजरात, पश्चिम बंगाल, चंडीगढ़, पंजाब, केरल, अऊ आंध्र प्रदेश ल हराके फाइनल म प्रवेश करे रहिन।