ड्राइविंग म रुचि ले अजय ल मिलीस काम अऊ पहिचान: मुख्यमंत्री कौशल विकास ले बदलीस किस्मत

मनेन्द्रगढ़, मुख्यमंत्री कौशल विकास योजना ह अजय पटेल के किस्मत बदल देहे हे। ये योजनांतर्गत अजय ह ड्राइविंग के ट्रेनिंग लीस अऊ आज ओ ह स्वच्छ भारत मिशन नगर पालिका परिषद मनेन्द्रगढ़ म वाहन ड्राइविंग करत हे। नगर पालिका परिषद मनेन्द्रगढ़ के वार्ड नंबर 17 के निवासी अजय पटेल के ड्राइविंग म रुचि रहिस, घर के आर्थिक समस्या मन के सेती वो ह विधिवत ट्रेनिंग नइ ले पात रहिस। अजय के बताती वोखर घर म माता-पिता के संग एक छोटे भाई घलोक हे। वोखर पिता मजदूरी करथे। परिवार म आर्थिक परेशानी रहिस। इही दौरान ओ ल मुख्यमंत्री कौशल विकास योजना के तहत निःशुल्क प्रशिक्षण के जानकारी मिलीस। प्रशिक्षण संस्था के माध्यम ले वो ह मुख्यमंत्री कौशल विकास योजना के अंतर्गत ड्राईवर कम-मैकेनिक के प्रशिक्षण प्राप्त करिस। जेखर सेती वो ल स्वच्छ भारत मिशन नगर पालिका परिषद मनेन्द्रगढ़ के अंतर्गत ड्राइविंग के काम मिलीस। ड्राइविंग के काम अऊ प्रति महिना 6 हजार के आमदनी ले अजय अड़बड़ खुश हे। वो एखर बर छत्तीसगढ़ शासन अऊ जिला प्रशासन के आभार जतात कहिस के मुख्यमंत्री कौशल विकास योजना मनखे मन के हुनर तराश करके ओ मन ल आत्मनिर्भर बनावत हे। कौशल प्रशिक्षण प्राप्त करके ड्राईवर के नौकरी मिलिस अऊ परिवार के आर्थिक स्थिति ल सहारा मिलीस, अब वो ह घर खर्च म अपन पिता के हाथ बंटावत हे।