जशपुर, 25 अगस्त 2021। निशा राज ताम्रकार आज आत्मनिर्भर हे, वो अपन कमाई ले परिवार के घलोक मदद करत हे। जशपुर के रहइया निशा के बताती ओला शुरू ले ही कम्प्यूटर के क्षेत्र म विशेष रूचि रहिस। ते पाए के वो ह ये क्षेत्र ल ही अपन रोजगार के जरिया बनाना चाहत रहिस। जब ओला मुख्यमंत्री कौशल विकास योजना के बारे मे जानकारी मिलीस त वो ह कौशल अउ विकास प्राधिकरण के सहायक संचालक ले संपर्क करिस अऊ योजना के संबंध मे जानकारी लीस। एखर बाद निशा ह लाईवलीवुड कॉलेज जशपुर ले कम्प्यूटर के प्रशिक्षण प्राप्त करिस। सफलतापूर्वक प्रशिक्षण प्राप्त करे के बाद निशा राज ताम्रकार ल कौशल विकास विभाग कोति ले लोक स्वास्थ्य यांत्रिकी विभाग जशपुर म कम्प्यूटर ऑपरेटर के पद म रोजगार मिल गे।
निशा अऊ वोखर जइसे कई युवा मुख्यमंत्री कौशल विकास योजनांतर्गत प्रशिक्षण लेके अपन सपना ल पूरा करत हें। ओ मन ल उंखर रूचि के मुताबिक कई ठन ट्रेड म प्रशिक्षण देके रोजगार ले जोड़े जात हे। निशा ह एखर बर छत्तीसगढ़ शासन अऊ जिला प्रशासन ल धन्यवाद देवत कहिस के ओ अपन काम सफलतापूर्वक करत हे। ओ ल हर महीना 8 हजार रूपिया मिलत हे।
निशा राज के सपनों ल मिलीस उड़ान मुख्यमंत्री कौशल विकास योजना
